اقش-تىڭ جاڭا ورلەان قالاسىنىڭ بيلىگى جاڭا جىل ءتۇنى بولعان قورقىنىشتى وقيعا تۋرالى جاڭا مالىمەتتەردى جاريالادى، دەپ حابارلايدى "ادىرنا" ۇلتتىق پورتالى Fox News-كە سىلتەمە جاساپ.
جاڭا ورلەان پوليتسياسىنىڭ باسشىسى ەنن كيركپاتريكتىڭ پىكىرىنشە، دەمالۋشىلارعا سوققى ادەيى جاسالعان.
"بۇل ادام مۇمكىندىگىنشە كوپ ادامدى باسىپ وتپەك بولدى", - دەيدى ول.
مالىمەتتەرگە سۇيەنسەك، ادامدارعا شابۋىل جاساعان ەر ادام پوليتسەيلەرمەن اتىس كەزىندە قايتىس بولعان. بىراق ونىڭ ءتارتىپ ساقشىلارىنىڭ وعىنان قازا تاپقانى نەمەسە وزىنە-ءوزى قول جۇمساعانى ءالى بەلگىسىز.
قازىرگى ۋاقىتتا وقيعا بولعان كوشەدە فبر قىزمەتكەرلەرى جۇمىس ىستەۋدە. ولار وقيعا ورنىنان قولدان جاسالعان جارىلعىش قۇرىلعىلار تاپقانىن حابارلادى. قازىر ساپەرلەر ولاردىڭ قاۋىپسىزدىگىن انىقتاۋدا.
جاڭا ورلەان مەرى لاتويا كانترەلل بۇل وقيعانى "تەرروريستىك شابۋىل" دەپ اتادى. الايدا فبر بۇل مالىمدەمەنى راستامادى.
ەسكە سالايىق، قايعىلى وقيعا 1 قاڭتار كۇنى تاڭعى 3:15-تە تۋريستەر اراسىندا تانىمال فرانتسۋز كۆارتالىندا جاڭا جىلدىق مەرەكەلەر كەزىندە ورىن العان. كۋاگەرلەردىڭ ايتۋىنشا، پيكاپ ادامدار توبىنا سوعىلىپ، سودان كەيىن جۇرگىزۋشى كولىكتەن شىعىپ، وق جاۋدىرعان. سالدارىنان 10 ادام قازا تاپقان جانە 30 ادام جاراقات العانى. سونىمەن قاتار، ەكى پوليتسيا قىزمەتكەرى دە جارالانعان.
