وڭتۇستىك كورەيادا 29 جەلتوقساندا مۋانا اۋەجايىندا اپاتقا ۇشىراعان Jeju Air اۋە كومپانياسىنىڭ ۇشاعىنىڭ ۇشقىشتار كابيناسىندا ورناتىلعان ەكى بورتتىق جازعىشتىڭ بىرىنەن دەرەكتەر الىندى، دەپ حابارلايدى "ادىرنا" ۇلتتىق پورتالى The Hankyoreh-كە سىلتەمە جاساپ.
"ۇشقىشتار كابيناسىنداعى سويلەسۋلەردى تىركەيتىن جازعىشتان دەرەكتەردى الۋ اياقتالدى. بۇگىن ولاردى دىبىستىق فايلدارعا تۇرلەندىرۋ جۇمىستارى باستالدى", – دەدى وڭتۇستىك كورەيا كولىك مينيسترلىگىنىڭ ازاماتتىق اۆياتسيا دەپارتامەنتىنىڭ ديرەكتورى چجۋ چجون ۆان.
سويلەسۋلەردە قۇستىڭ سوقتىعىسۋىنان قوزعالتقىشتىڭ زاقىمدالۋى، ءرۋلدى رەتتەۋدىڭ مۇمكىن بولماۋى، سونداي-اق قونۋ قوندىرعىسىنىڭ ىستەن شىعۋىنا بايلانىستى اپاتقا ۇشىراۋ تۋرالى اقپارات بولۋى مۇمكىن دەپ بولجانۋدا.
ساراپشىلار ەكىنشى جازعىشتىڭ زاقىمدانۋى جازىلعان دەرەكتەردىڭ ساقتالۋىنا اسەر ەتپەگەنىن انىقتادى.
ەل بيلىگى اپاتتىڭ نەگىزگى سەبەبىن انىقتاۋدا ماڭىزدى ءرول اتقاراتىن "قارا جاشىكتى" تالداۋدى جەدەلدەتەتىنىن اتاپ ءوتتى.
ەستەرىڭىزگە سالا كەتەيىك، Jeju Air اۋە كومپانياسىنىڭ Boeing 737-800 ۇشاعى 29 جەلتوقساندا وڭتۇستىك كورەيانىڭ مۋانا اۋەجايىنا قونعان كەزدە اپاتقا ۇشىرادى. اپات جەرگىلىكتى ۋاقىت بويىنشا تاڭعى 9:07-دە ورىن الدى. ۇشاق ۇشۋ-قونۋ جولاعىنان ءوتىپ، قورشاۋعا سوعىلىپ، ورتەنگەن.
ۇشاقتا 181 ادام بولعان. ولاردىڭ ەكەۋى عانا امان قالعان. ورتاشا جانە اۋىر جاراقاتتارى بار بولعاندىقتان، ولار اۋرۋحانالارعا جەتكىزىلدى.
