بوليۆيا اسكەري-اۋە كۇشتەرىنە تيەسىلى ۇشاق ەل-التو قالاسىنىڭ اۋەجايىنا قونۋ كەزىندە اپاتقا ۇشىرادى، دەپ حابارلايدى “ادىرنا” ۇلتتىق پورتالى ۆۆس-گە سىلتەپ.
جەرگىلىكتى ازاماتتىق اۆياتسيا باسقارماسىنىڭ مالىمەتىنشە، اۋە كەمەسى ۇشۋ-قونۋ جولاعىنان شىعىپ كەتكەن. سالدارىنان جانىنداعى تاسجولعا بارىپ قۇلاعان.
ۇشاق بولشەكتەنىپ، ورتەنگەن. ونىڭ سىنىقتارى سول ساتتە جولمەن ءوتىپ بارا جاتقان كولىكتەرگە ءتيىپ، بىرنەشە اۆتوكولىك زاقىمداندى.
رەسمي ورگاننىڭ حابارلاۋىنشا، اپات سالدارىنان كەمىندە 15 ادام قازا تاپقان. ولاردىڭ اراسىندا ەكيپاج مۇشەلەرى مەن تاسجولداعى كولىكتەردە بولعان ادامدار بار.
ۇشاق بوليۆيانىڭ ورتالىق بانكىنىڭ تاپسىرىسى بويىنشا لا-پاس قالاسىنا جاڭا بانكنوتتاردى تاسىمالداعان. اپاتتان كەيىن اقشا كۋپيۋرالارى اينالاعا شاشىلىپ كەتكەن. وقيعا ورنىنا جينالعان ادامدار ولاردى جيناۋعا تىرىسقان.
ءتارتىپ ساقشىلارى جۇرتتى تاراتۋ ءۇشىن كوزدەن جاس اعىزاتىن گاز قولدانعان.
وقيعادان كەيىن بوليۆيا ورتالىق بانكىنىڭ باسشىسى داۆيد ەسپينوسا اپاتقا ۇشىراعان ۇشاقپەن تاسىمالدانعان بانكنوتتار جارامسىز دەپ تانىلعانىن جانە تولەم قۇرالى رەتىندە قابىلدانبايتىنىن مالىمدەدى.
