Ońtústik Koreıada 29 jeltoqsanda Mýana áýejaıynda apatqa ushyraǵan Jeju Air áýe kompanııasynyń ushaǵynyń ushqyshtar kabınasynda ornatylǵan eki borttyq jazǵyshtyń birinen derekter alyndy, dep habarlaıdy "Adyrna" ulttyq portaly The Hankyoreh-ke silteme jasap.
"Ushqyshtar kabınasyndaǵy sóılesýlerdi tirkeıtin jazǵyshtan derekterdi alý aıaqtaldy. Búgin olardy dybystyq faıldarǵa túrlendirý jumystary bastaldy", – dedi Ońtústik Koreıa kólik mınıstrliginiń azamattyq avıaııa departamentiniń dırektory Chjý Chjon Van.
Sóılesýlerde qustyń soqtyǵysýynan qozǵaltqyshtyń zaqymdalýy, rýldi retteýdiń múmkin bolmaýy, sondaı-aq qoný qondyrǵysynyń isten shyǵýyna baılanysty apatqa ushyraý týraly aqparat bolýy múmkin dep boljanýda.
Sarapshylar ekinshi jazǵyshtyń zaqymdanýy jazylǵan derekterdiń saqtalýyna áser etpegenin anyqtady.
El bıligi apattyń negizgi sebebin anyqtaýda mańyzdy ról atqaratyn "qara jáshikti" taldaýdy jedeldetetinin atap ótti.
Esterińizge sala keteıik, Jeju Air áýe kompanııasynyń Boeing 737-800 ushaǵy 29 jeltoqsanda Ońtústik Koreıanyń Mýana áýejaıyna qonǵan kezde apatqa ushyrady. Apat jergilikti ýaqyt boıynsha tańǵy 9:07-de oryn aldy. Ushaq ushý-qoný jolaǵynan ótip, qorshaýǵa soǵylyp, órtengen.
Ushaqta 181 adam bolǵan. Olardyń ekeýi ǵana aman qalǵan. Ortasha jáne aýyr jaraqattary bar bolǵandyqtan, olar aýrýhanalarǵa jetkizildi.
