وڭتۇستىك كورەيانىڭ مۋان قالاسىندا 29 جەلتوقسان كۇنى تاڭەرتەڭ قونۋعا بەت العان جولاۋشىلار ۇشاعىنىڭ اپاتقا ۇشىراۋى سالدارىنان قازا تاپقان 179 ادامنىڭ بارلىعىنىڭ دەنەسى تابىلدى، دەپ حابارلايدى "ادىرنا" ۇلتتىق پورتالى Yonhap اگەنتتىگىنە سىلتەمە جاساپ.
"29 جەلتوقسان كۇنى ساعات 21:07-دە (استانا ۋاقىتىمەن 17:07) Jeju Air اۋە كومپانياسىنىڭ اۋە اپاتى سالدارىنان قازا تاپقاندار سانى 179 ادامعا جەتتى", – دەلىنگەن ۇلتتىق ءورت ءسوندىرۋ قىزمەتىنىڭ مالىمەتتەرىنە سۇيەنگەن اگەنتتىك حابارلاماسىندا.
Yonhap اگەنتتىگىنىڭ مالىمەتىنشە، بۇل اۋە اپاتى وڭتۇستىك كورەيا تاريحىنداعى ەڭ كوپ ادام شىعىنى بولعان وقيعا بولىپ وتىر. وڭتۇستىك كورەيا پرەزيدەنتىنىڭ مىندەتىن اتقارۋشى چحۆە سان موك 29 جەلتوقساننان 4 قاڭتارعا دەيىن جەتى كۇندىك ۇلتتىق ازا تۇتۋ كۇندەرىن جاريالادى.
ۇشاق اپاتىنىڭ سەبەپتەرى ءالى انىق ەمەس، باستى بولجامداردىڭ قاتارىندا قۇستارمەن سوقتىعىسۋ، قوزعالتقىش پەن ءشاسسيدىڭ اقاۋلارى، تەجەگىش جۇيەسىنىڭ ىستەن شىعۋى جانە ۇشۋ-قونۋ جولاعىنىڭ جەتكىلىكسىز ۇزىندىعى اتالىپ وتىر.
ۇشاق قونۋعا ەكى رەت ارەكەت جاساعان. العاشقى ءساتسىز ارەكەتكە ءشاسسيدىڭ نەمەسە قوزعالتقىشتىڭ اقاۋى سەبەپ بولۋى مۇمكىن. كەيىن ۇشاق كورپۋسىنا قونۋعا تىرىسقان. بىراق ونىڭ الدىڭعى بولىگى كوتەرىڭكى قالىپتا بولىپ، ۇشۋ-قونۋ جولاعىندا جوعارى جىلدامدىقپەن قوزعالعان.
بەينەجازبالاردان ۇشاقتىڭ ۇشۋ-قونۋ جولاعىندا جىلدامدىعىن باسەڭدەتە الماعانى جانە ونىڭ الدىڭعى بولىگى جوعارى قالىپتا تۇرىپ، اقىرىندا بوگەتكە سوقتىعىسقانى كورىنەدى.
ەسكە سالا كەتەيىك، 29 جەلتوقسان كۇنى وڭتۇستىك كورەيانىڭ مۋان قالاسىنداعى اۋەجايعا قونۋ كەزىندە Bangkok–Muan باعىتى بويىنشا ۇشقان Jeju Air اۋە كومپانياسىنىڭ Boeing 737-800 ۇشاعى اپاتقا ۇشىرادى. اۋە اپاتى جەرگىلىكتى ۋاقىت بويىنشا تاڭعى ساعات 9:07-دە ورىن الدى. ۇشاق ۇشۋ-قونۋ جولاعىنان ءوتىپ كەتىپ، قورشاۋعا سوعىلىپ، ءورت شىققان.
ۇشاق بورتىندا 181 ادام بولعان. ولاردىڭ ەكەۋى امان قالدى – ءبىر ايەل جانە ءبىر ەر ادام. ەكەۋى دە ەكيپاج مۇشەلەرى. ولار ورتاشا جانە اۋىر جاراقات العان، قازىر اۋرۋحاناعا جەتكىزىلدى. ۇشاق جولاۋشىلارىنىڭ اراسىندا قازاقستاندىقتار بولماعان.
