ساياساتتانۋشى ع.ءابدىراحىموۆتىڭ شىمكەنت اكىمى قىزمەتىنەن شەتتەتىلۋىن ساياسي ەليتا ىشىندەگى ءوزارا قاقتىعىستارمەن بايلانىستىرادى
شىمكەنت قالاسىنىڭ ەكى دۇركىن ەكس-اكىمى عابيدوللا ءابدىراحىموۆ قىزمەتىنەن كەتكەن بەتتە، پرەزيدەنت اكىمشىلىگىنىڭ باسشىسى قىرىمبەك كوشەرباەۆ ول «سەنىمدى اقتامادى» دەپ سۋىت مالىمدەمە جاسادى. بۇل ءسوز قوعام ءۇشىن «ەكس-اكىم ەندى قايتىپ مەملەكەتتىك قىزمەتتىڭ تابالدىرىعىن اتتامايدى» دەگەندەي ەستىلگەن ەدى. بىراق، باسى داۋعا قالعان شەنەۋنىك ءبىر ايدىڭ ىشىندە قايتا قاتارعا قوسىلدى. وسى ورايدا «Azattyq Ruhy» ءتىلشىسى ساياساتتانۋشى دوسىم ساتپاەۆتىڭ پىكىرىن ءبىلدى.
«كوشەرباەۆتان كەتتى، مامينگە جەتتى»
ساياساتتانۋشى ع.ءابدىراحىموۆتىڭ شىمكەنت اكىمى قىزمەتىنەن شەتتەتىلۋىن ساياسي ەليتا ىشىندەگى ءوزارا قاقتىعىستارمەن بايلانىستىرادى. ال كوشەرباەۆتىڭ «سەنىمنەن شىقتى» دەگەنى تەك شارتتى تۇردە ايتىلعان ءسوز دەپ بىلەدى.
«سەنىم كرەديتى» دەگەن شىندىعىندا ەشقانداي ءمانى جوق، شەنەۋنىكتەر تىلىندەگى نومەنكلاتۋرالىق ۇعىم عانا. سەبەبى قازاقستاندىق بيۋروكراتيزم مىسالىندا بيلىكتىڭ ءۇمىتىن اقتاماي، ورنىنان الىنىپ تاستالىپ، ۋاقىت وتە قايتا لاۋازىمدى قىزمەتكە سايلانعانداردى تالاي كوردىك. كوپشىلىك كوزىنە ساياسي ەليتانىڭ ءبىر بولىگى ع. ابدىراحىموۆقا دەگەن سەنىمدى جوعالتسا، ەكىنشى جاعى جاڭا «سەنىم دەپوزيتىن» بەرگەندەي بولىپ كورىندى. الەۋمەتتتىك جەلىدەگى وسىنداي تۇرپاتتاعى ازىلدەردە دە ءبىر شىندىق بار. سوندىقتان، ونىڭ اكىم قىزمەتىنەن وتستاۆكاعا كەتۋى، الدىمەن، ساياسي ەليتا ىشىندەگى ءوزارا قاقتىعىستاردىڭ ناتيجەسى دەپ ويلايمىن. ال ۇكىمەت باسشىسىنا كەڭەسشى بولىپ، مەملەكەتتىك قىزمەتكە قايتا ورالۋى – سول قاقتىعىستاردىڭ جالعاسى ىسپەتتى. كورىپ وتىرعانىمىزداي، جۇيەدەن تولىق الاستاتىلعان جوق»،- دەدى ساياساتتانۋشى.
«بيلىكتىڭ ەمەس، حالىقتىڭ سەنىمى ماڭىزدى»
ساراپشى ءۇشىنشى مەگاپوليستىڭ ەكس-اكىمى «جارناماعا قۇمارلىعىنا» قاراماستان، ءبىرتالاي شارۋا اتقارىپ، تۇرعىنداردىڭ وڭ باعاسىن الىپ ۇلگەرگەنىن جوققا شىعارمايدى. سول سەبەپتى اكىمدى بيلىك باسىنداعىلار ەمەس، حالىقتىڭ ءوزى سايلايتىن جۇيەگە كوشۋ كەرەكتىگىن ايتادى.
«بىزدە بيلىك ەليتاسى اكىمدى ءوزى سايلايدى، ءوزى وتستاۆكاعا جىبەرەدى، ءوزى قايتا باسقا قىزمەت ۇسىنادى. حالىق تەك باقىلاۋشى رەتىندە قىزىقتاپ وتىرادى. حالىق تاڭداۋ قۇقىعىنان مۇلدەم شەتتەتىلگەن. اكىمدەردى حالىق سايلايتىن زاڭ بولعاندا شىمكەنت حالقى، مۇمكىن، ع.ءابدىراحىموۆتى جىبەرمەي الىپ قالار ما ەدى؟! سەبەبى ول پالەندەي ناشار كادر بولعان جوق. ءوزىن جارنامالاۋعا كوپ قۇمارتسا دا، قالا ءۇشىن ءبىراز نارسە ىستەۋگە تىرىسىپ باقتى. باسقالار وڭتۇستىكتى بۇرىنعىداي ستەرەوتيپتەرگە سۇيەنىپ دەپرەسسيۆتى ەمەس، قارقىندى دامۋ ۇستىندەگى ءوڭىر رەتىندە قابىلداي باستادى. سوندىقتان دا «سەنىم كرەديتى» دەگەن ۇعىمنىڭ انىقتاماسىن تۇبەگەيلى وزگەرتۋىمىز كەرەك. بيلىكتىڭ ەمەس، حالىقتىڭ سەنىمى ەسكەرىلۋى ءتيىس»، - دەگەن ويىن جەتكىزدى ول.
لوندون مەن «ولگا VIP-ءتىڭ» كىناسى جوق
ع.ءابدىراحىموۆ وتستاۆكاعا كەتكەندە، كوپشىلىك وعان لوندون قالاسىنان سالەم جولداپ، ەلدىڭ سىنىنا ۇشىراعان ۆيدەوسىنىڭ كەسىرى ءتيدى دەپ ويلاعان. جىعىلعانعا جۇدىرىق بولعانداي، سول ۋاقىتتا عالامتوردا ابدىراحىموۆقا بۇرىننان تەلىپ جۇرگەن ينستاگرامداعى بيكەشتىڭ سۋرەتتەرى دە تاراپ كەتتى. د.ساتپاەۆ بۇل جاعدايلاردىڭ ءبارى ەكس-اكىمدى جۇمىستان شىعارۋعا تەك سىلتاۋ بولدى دەيدى.
«ەڭ قىزىعى، ع.ءابدىراحىموۆ قىزمەتىنەن شىمكەنت رەسپۋبليكالىق دارەجەدەگى قالا ستاتۋسىن العاننان كەيىن بوساتىلدى. ياعني، سول كەزدەن باستاپ ەليتا ءۇشىن شىمكەنتتىڭ ءرولى الماتى سياقتى بىردەن ارتىپ شىعا كەلدى. ارينە، سوندىقتان قالا اكىمىنىڭ «كرەسلوسىنا» تالاس تا كۇشەيە بەرەدى. مۇنى دا ءابدىراحىموۆتىڭ قىزمەتتەن كەتۋى سەبەپتەرىنىڭ ءبىر نۇسقاسى رەتىندە قاراستىرۋ كەرەك شىعار»، - دەيدى ساراپشى.
«كەڭەسشىلىك – جاڭا لاۋازىمعا جەتەلەيتىن كوپىر»
ساتپاەۆقا سەنسەك، ءابدىراحىموۆ پرەمەر-ءمينيستردىڭ كەڭەسشى بولىپ ۇزاق وتىرمايدى. ەگەر پرەزيدەنت اكىمشىلىگىندەگىلەر قايتا اشۋعا مىنسە، ول كوپشىلىك ازىلدەگەندەي «سۇيىكتى» لوندونىنا كەتەدى، بولماسا باسقا ءبىر جىلى ورىنعا جايعاسادى. ال كەڭەسشىلىك دەگەن - جاعدايى «قىل ۇستىندەگى» شەنەۋنىكتەر ءۇشىن ترانزيت ىسپەتتەس.
«ارينە، پرەمەر-ءمينيستردىڭ كەڭەسشىسى بولۋ - بۇرىنعى مەگاپوليس اكىمى ءۇشىن قىزمەتتە تومەندەۋ. «كومەكشى»، «كەڭەسشى» دەگەن اتاۋلار قۇلاققا ادەمى ەستىلگەنىمەن، ولاردىڭ قولىندا ەشقانداي بيلىك جوق. بىزدەگى پراكتيكا كورسەتكەندەي، بۇل ورىندارعا ادەتتە بولاشاقتا جاڭا ءبىر لاۋازىمدى ورىنعا تاعايىندالاتىن كادرلاردى قويادى. ۇقساس جاعدايلار بۇرىن دا بولعان»، - دەپ تۇسىندىرەدى ساياساتتانۋشى.
وسىعان ۇقساس جاعداي رەتىندە «پاتامۋشتا، پاتامۋشتا» سوزىمەن ەستە قالعان بۇرىنعى ەڭبەك جانە الەۋمەتتىك دامۋ ءمينيسترى سەرىك ابدەنوۆتى مىسالعا كەلتىردى. باسىنا جۇمىرتقا ءتيىپ، داۋ-دامايمەن وتستاۆكاعا كەتكەن ابدەنوۆ تە كوپ ۇزاماي كەڭەسشى بولىپ قىزمەتكە تۇرعان. بىراق پرەمەر-ءمينيستردىڭ ەمەس، سول كەزدەگى «قازمۇنايگاز» باسشىسى ساۋات مىڭباەۆتىڭ جانىنان تابىلىپ ەدى. قازىر «قازاقستان تەمىر جولى» ۇق» اق باسقارما توراعاسىنىڭ ورىنباسارى.
سۇحباتتاسقان - اباي سەيفۋللا
«Azattyq Ruhy»
