Dosym Sátpaev: Ábdirahymov úshin keńesshi qyzmeti - tramplın

1021

Saıasattanýshy Ǵ.Ábdirahymovtyń Shymkent ákimi qyzmetinen shettetilýin saıası elıta ishindegi ózara qaqtyǵystarmen baılanystyrady

Shymkent qalasynyń eki dúrkin eks-ákimi Ǵabıdolla Ábdirahymov qyzmetinen ketken bette, Prezıdent ákimshiliginiń basshysy Qyrymbek Kósherbaev ol «senimdi aqtamady» dep sýyt málimdeme jasady. Bul sóz qoǵam úshin «eks-ákim  endi qaıtyp memlekettik qyzmettiń tabaldyryǵyn attamaıdy» degendeı estilgen edi. Biraq, basy daýǵa qalǵan sheneýnik bir aıdyń ishinde qaıta qatarǵa qosyldy. Osy oraıda «Azattyq Ruhy» tilshisi saıasattanýshy Dosym Sátpaevtyń pikirin bildi.

«Kósherbaevtan ketti, Mamınge jetti»

Saıasattanýshy Ǵ.Ábdirahymovtyń Shymkent ákimi qyzmetinen shettetilýin saıası elıta ishindegi ózara qaqtyǵystarmen baılanystyrady. Al Kósherbaevtyń «senimnen shyqty» degeni tek shartty túrde aıtylǵan sóz dep biledi.

«Senim kredıti» degen shyndyǵynda eshqandaı máni joq, sheneýnikter tilindegi nomenklatýralyq uǵym ǵana. Sebebi qazaqstandyq bıýrokratızm mysalynda bıliktiń úmitin aqtamaı, ornynan alynyp tastalyp, ýaqyt óte qaıta laýazymdy qyzmetke saılanǵandardy talaı kórdik. Kópshilik kózine saıası elıtanyń bir bóligi Ǵ. Ábdirahymovqa degen senimdi joǵaltsa, ekinshi jaǵy jańa «senim depozıtin» bergendeı bolyp kórindi. Áleýmetttik jelidegi osyndaı turpattaǵy ázilderde de bir shyndyq bar. Sondyqtan, onyń ákim qyzmetinen otstavkaǵa ketýi, aldymen, saıası elıta ishindegi ózara qaqtyǵystardyń nátıjesi dep oılaımyn. Al Úkimet basshysyna keńesshi bolyp, memlekettik qyzmetke qaıta oralýy – sol qaqtyǵystardyń jalǵasy ispetti. Kórip otyrǵanymyzdaı, júıeden tolyq alastatylǵan joq»,- dedi saıasattanýshy.

«Bıliktiń emes, halyqtyń senimi mańyzdy»

Sarapshy úshinshi megapolıstiń eks-ákimi «jarnamaǵa qumarlyǵyna» qaramastan, birtalaı sharýa atqaryp, turǵyndardyń oń baǵasyn alyp úlgergenin joqqa shyǵarmaıdy. Sol sebepti ákimdi bılik basyndaǵylar emes, halyqtyń ózi saılaıtyn júıege kóshý kerektigin aıtady.

«Bizde bılik elıtasy  ákimdi ózi saılaıdy, ózi otstavkaǵa jiberedi, ózi qaıta basqa qyzmet usynady. Halyq tek baqylaýshy retinde qyzyqtap otyrady. Halyq tańdaý  quqyǵynan múldem shettetilgen. Ákimderdi halyq saılaıtyn zań bolǵanda Shymkent halqy, múmkin, Ǵ.Ábdirahymovty jibermeı alyp qalar ma edi?! Sebebi ol pálendeı nashar kadr bolǵan joq. Ózin jarnamalaýǵa kóp qumartsa da, qala úshin biraz nárse isteýge tyrysyp baqty. Basqalar Ońtústikti burynǵydaı stereotıpterge súıenip depressıvti emes, qarqyndy damý ústindegi óńir retinde qabyldaı bastady. Sondyqtan da «senim kredıti» degen uǵymnyń anyqtamasyn túbegeıli ózgertýimiz kerek. Bıliktiń emes, halyqtyń senimi eskerilýi tıis», - degen oıyn jetkizdi ol.

London men «Olga VIP-tiń» kinási joq

Ǵ.Ábdirahymov otstavkaǵa ketkende, kópshilik oǵan London qalasynan sálem joldap, eldiń synyna ushyraǵan vıdeosynyń kesiri tıdi dep oılaǵan. Jyǵylǵanǵa judyryq bolǵandaı, sol ýaqytta ǵalamtorda Ábdirahymovqa burynnan telip júrgen Instagramdaǵy bıkeshtiń sýretteri de tarap ketti. D.Sátpaev bul jaǵdaılardyń bári eks-ákimdi jumystan shyǵarýǵa tek syltaý boldy deıdi.

«Eń qyzyǵy, Ǵ.Ábdirahymov qyzmetinen Shymkent respýblıkalyq dárejedegi qala statýsyn alǵannan keıin bosatyldy. Iaǵnı, sol kezden bastap elıta úshin Shymkenttiń róli Almaty sııaqty birden artyp shyǵa keldi. Árıne, sondyqtan qala ákiminiń «kreslosyna» talas ta kúsheıe beredi. Muny da Ábdirahymovtyń qyzmetten ketýi sebepteriniń bir nusqasy retinde qarastyrý kerek shyǵar», - deıdi sarapshy.

«Keńesshilik – jańa laýazymǵa jeteleıtin kópir»

Sátpaevqa sensek, Ábdirahymov Premer-mınıstrdiń keńesshi bolyp uzaq otyrmaıdy. Eger Prezıdent ákimshiligindegiler qaıta ashýǵa minse, ol kópshilik ázildegendeı «súıikti» Londonyna ketedi, bolmasa basqa bir jyly orynǵa jaıǵasady. Al keńesshilik degen - jaǵdaıy «qyl ústindegi» sheneýnikter úshin tranzıt ispettes.

«Árıne, Premer-mınıstrdiń keńesshisi bolý - burynǵy megapolıs ákimi úshin qyzmette tómendeý. «Kómekshi», «keńesshi» degen ataýlar qulaqqa ádemi estilgenimen, olardyń qolynda eshqandaı bılik joq. Bizdegi praktıka kórsetkendeı, bul oryndarǵa ádette bolashaqta jańa bir laýazymdy orynǵa taǵaıyndalatyn kadrlardy qoıady. Uqsas jaǵdaılar buryn da bolǵan», - dep túsindiredi saıasattanýshy.

Osyǵan uqsas jaǵdaı retinde «Patamýshta, patamýshta» sózimen este qalǵan burynǵy Eńbek jáne áleýmettik damý mınıstri Serik Ábdenovti mysalǵa keltirdi. Basyna jumyrtqa tıip, daý-damaımen otstavkaǵa ketken Ábdenov te kóp uzamaı keńesshi bolyp qyzmetke turǵan. Biraq Premer-mınıstrdiń emes, sol kezdegi «QazMunaıGaz»  basshysy Saýat Myńbaevtyń janynan tabylyp edi. Qazir «Qazaqstan Temir Joly» UQ» AQ basqarma tóraǵasynyń orynbasary.

 Suhbattasqan - Abaı SEIFÝLLA

«Azattyq Ruhy»

Pikirler