بۇگىن الماتىداعى قر پرەزيدەنتى ارحيۆىندە «الاشوردا ءىسى. 1920-1940 جج. قۇجاتتار مەن ماتەريالدار» اتتى 12 تومدىق جيناقتىڭ تانىستىرىلىمى ءوتتى. بۇل جيناق الاش قوزعالىسىنا قاتىستى ارحيۆتىك دەرەكتەردى تولىق قامتيتىن بىرەگەي ەڭبەك رەتىندە تانىلدى.
جيناق قر ۇلتتىق قاۋىپسىزدىك كوميتەتى، ىشكى ىستەر مينيسترلىگى جانە باس پروكۋراتۋرانىڭ ارحيۆ قورلارىندا بۇرىن قۇپيا ساقتالعان ماتەريالدار نەگىزىندە قۇراستىرىلعان. وندا الاش قايراتكەرلەرىنىڭ قىزمەتى، ولاردىڭ وتباسى مۇشەلەرىنە قاتىستى تەرگەۋ ماتەريالدارى، سونىمەن قاتار ءتۇرلى كوتەرىلىستەر مەن سول كەزەڭدەگى تاريحي وقيعالار قامتىلعان.
جيناقتىڭ تانىستىرىلىمىندا تاريح عىلىمدارىنىڭ دوكتورى، پروفەسسور مامبەت قويگەلدى بۇل جۇمىستى وداق كولەمىندەگى ەڭ اۋقىمدى ءارى ناتيجەلى ەڭبەك دەپ باعالادى. ونىڭ ايتۋىنشا، كوپتومدىق الاش قوزعالىسى، جەر ماسەلەسى، قۋدالانعان اۋلەتتەر، وپپوزيتسيالىق توپتار تۋرالى تولىققاندى دەرەكتەر ۇسىنادى.
- العاش رەت قازاق قوعامىنداعى وپپوزيتسيا تاقىرىبىنا ەرەكشە كوڭىل بولىنگەن.
- الاشتى قولداعان بايلار مەن قۋدالانعان ءدىني قايراتكەرلەردىڭ تاعدىرى تۋرالى قۇجاتتار ەنگىزىلگەن.
- الاش قايراتكەرلەرىن اقتاۋ، حالىق كوتەرىلىستەرى مەن جەر ماسەلەسى تۋرالى دەرەكتەر توپتاستىرىلعان.
كوپتومدىقتى دايىنداۋعا قر مەملەكەتتىك كەڭەسشىسى ەرلان قاريننىڭ قولداۋ كورسەتكەنى اتاپ ءوتىلدى. «بۇل جيناق حح عاسىرداعى قازاقستان تاريحىن تەرەڭىرەك زەرتتەۋ ءۇشىن تاپتىرماس قۇندى ەڭبەك»، - دەدى پروفەسسور.
كىتاپتىڭ تولىق تانىستىرىلىمى 2025 جىلدىڭ قاڭتار ايىندا وتەدى.
