اقش پرەزيدەنتى دجو بايدەن اقباس بۇركىتتى ۇلتتىق قۇس دەپ تانۋ تۋرالى زاڭعا قول قويدى، دەپ حابارلايدى “ادىرنا” ۇلتتىق پورتالى golosameriki-گە سىلتەپ.
“23 جەلتوقسان، دۇيسەنبى كۇنى پرەزيدەنت امەريكا قۇراما شتاتتارى كودەكسىنىڭ 36-تاراۋىنا تۇزەتۋلەر ەنگىزەتىن جانە اقباس بۇركىتتى ۇلتتىق قۇس دەپ جاريالايتىن زاڭعا قول قويدى”، — دەلىنگەن مالىمدەمەدە.
اقباس بۇركىت 1782 جىلدان بەرى اقش-تىڭ نەگىزگى رامىزدەرىنىڭ ءبىرى بولىپ سانالادى. ونىڭ بەينەسى ەلتاڭبادا، پرەزيدەنتتىك ستاندارتتا، بانكنوتتاردا، مەملەكەتتىك قۇجاتتاردا جانە ۇلتتىق كورپوراتسيالاردىڭ لوگوتيپتەرىندە ءجيى قولدانىلادى. 1782 جىلى اقش كونگرەسى بۇل جىرتقىش قۇستى ۇلتتىق سيمۆول رەتىندە بەكىتكەن. الايدا وسى ۋاقىتقا دەيىن رەسمي زاڭداردا ۇلتتىق قۇس رەتىندە ارنايى بەكىتۋ قاراستىرىلماعان ەدى.
بۇل زاڭ اقش-تىڭ تاريحي رامىزدەرىن زاڭنامالىق تۇرعىدا ناقتىلاۋ جانە نىعايتۋ باعىتىندا قابىلدانعان ماڭىزدى شەشىم بولىپ وتىر.
