باكۋ-گروزنىي باعىتىنداعى AZAL اۋە كومپانياسىنىڭ ۇشاعى گروزنىي قالاسىنا جاقىنداعاندا رەسەيدىڭ «پانتسير-س» اۋە قورعانىس جۇيەسىنىڭ شابۋىلىنا ۇشىراعانى انىقتالدى، دەپ حابارلايدى “ادىرنا” ۇلتتىق پورتالى.
بۇل تۋرالى Caliber.Az رەداكتسياسى مالىمدەدى.
رەداكتسيا مالىمەتىنشە، الدىن الا تەرگەۋ ناتيجەلەرى بويىنشا رەسەيلىك تاراپتىڭ راديوەلەكتروندىق كۇرەس (رەب) جۇيەلەرىن قولدانۋى سالدارىنان ازەربايجاندىق ۇشاقتىڭ بايلانىس جۇيەسى تولىق ىستەن شىققان. وسى سەبەپتى ۇشاق رەسەي اۋە كەڭىستىگىندە رادارلاردان جوعالىپ، تەك كاسپي تەڭىزىنىڭ ۇستىندە عانا قايتا تابىلدى.
رەسەي دەرەككوزدەرىنە سايكەس، شەشەنستان اۋماعىندا رەيس كەزىندە رەسەيدىڭ اۋە قورعانىس كۇشتەرى ۋكرايندىق درونداردى اتىپ تۇسىرۋگە تىرىسقان. شەشەن رەسپۋبليكاسى قاۋىپسىزدىك كەڭەسىنىڭ باسشىسى حامزات قادىروۆ 25 جەلتوقسان تاڭىندا گروزنىيعا دروندار شابۋىل جاساعانىن راستادى، بىراق زارداپ شەككەندەر مەن قيراندىلار بولماعانىن ايتتى. مۇنداي جاعدايدا رەسەي تاراپى ازاماتتىق ۇشاقتار ءۇشىن اۋە كەڭىستىگىن جابۋى ءتيىس ەدى. الايدا بۇل شارا قابىلدانبادى. شەشەنستان ۇستىندە ۇشۋ ايماعىنىڭ جابىلماۋى ۇلكەن سۇراق تۋدىرادى.
گروزنىي قالاسىنىڭ اۋەجايى ۇشاققا قونۋعا رۇقسات بەرمەگەنى انىق. سونىمەن قاتار، بورتقا ماحاچكالا مەن مينەرالدى سۋلار اۋەجايلارىندا دا قونۋعا رۇقسات ەتىلمەگەن. اۋە قورعانىس جۇيەسىنىڭ شابۋىلىنا جانە رەب اسەرىنە ۇشىراعان ەكيپاج قازاقستاننىڭ اقتاۋ قالاسىنا باعىتتالعان. كەيبىر ساراپشىلاردىڭ ايتۋىنشا، بۇل ۇسىنىستىڭ ماقساتى ۇشاقتى كاسپي تەڭىزىنە قۇلاتۋ بولعان. باق-تا جاريالانعانداي، سول ارقىلى كۋاگەرلەردىڭ ءبارى قازا تاۋىپ، ۇشاق سۋعا باتىپ كەتۋى مۇمكىن ەدى.
رەسەيلىك باق-تا تاراتىلىپ جاتقان بالاما نۇسقالار قوعامدىق پىكىردى شاتاستىرۋ ءۇشىن جاسالعان اقپاراتتىق شابۋىل رەتىندە باعالانۋدا. ۇشاق سالونىنداعى ۆيدەولاردان ەكى جولاۋشىنىڭ جارقىنشاقتان جارالانعانى انىقتالدى. جولاۋشىلاردىڭ جارىلىس دىبىستارىن ەستىگەنى تۋرالى كۋاگەرلىك مالىمەتتەرى اۋە قورعانىس كۇشتەرىنىڭ جۇمىسىن راستايدى.
ازەربايجان تاراپى ءۇشىن جاعداي ايقىن. بۇل ارەكەت قاساقانا جاسالماعان بولۋى مۇمكىن. الايدا انىقتالعان فاكتىلەردى ەسكەرە وتىرىپ، باكۋ رەسەي تاراپىنان ازەربايجاندىق ۇشاقتى اتىپ تۇسىرگەنىن مويىنداۋىن، ەل حالقىنان رەسمي تۇردە كەشىرىم سۇراۋىن جانە كىنالىلەردى جاۋاپكەرشىلىككە تارتۋ ءۇشىن تولىققاندى تەرگەۋ جۇرگىزۋدى كۇتەدى.
