2024 jylǵy 26 jeltoqsanda Almaty garnızonynyń áskerı sotynda Qańtar oqıǵasy kezinde atylǵan Erlan Jaǵyparov pen Áýez Qapsalanovtyń ólimine qatysty sot-medıınalyq sarapshylardyń esepteri tyńdaldy, dep habarlaıdy "Adyrna" ulttyq portaly "Vlast" redakııasyna silteme jasap.
Eki azamat 2022 jylǵy 6 qańtarda Almatydaǵy Respýblıka alańynda oqqa ushqan. Bul oqıǵa boıynsha kúdikti retinde Ulttyq gvardııanyń 5571 áskerı bóliminiń tárbıe jáne áleýmettik-quqyqtyq jumysy jónindegi orynbasary Aıtjan Áýbákirov jaýapqa tartylýda. Ol «qyzmetin asyra paıdalaný» baby boıynsha aıyptalyp otyr.
Sot otyrysynda sarapshylar eki azamattyń denesinen tabylǵan jaraqattar týraly málimet berdi.
35 jastaǵy Áýez Qapsalanov tórt oq jaraqatyn alǵan.
Jaraqattar oń qolynda, arqasynda eki, aıaǵynda bir ret tirkelgen. Sarapshy jaraqattardyń jaqyn qashyqtyqtan emes, alys aralyqtan jasalǵanyn, biraq naqty araqashyqtyqty anyqtaý múmkin bolmaǵanyn aıtty.
Erlan Jaǵyparovtyń denesinen 13 jaraqat tabylǵan, biraq sarapshy keıbir jaraqattar týra oq tıgennen emes, janama soqqydan bolǵanyn atap ótti.
Onyń denesinde avtomat dúmimen urǵan soqqy izderi anyqtalǵan. 10 oq jaraqatynyń ishinde kiretin, janama, shyǵatyn jáne tuıyq jaraqattar bar. Denede qalǵan úsh oq jaraqaty tirkelgen. Jaraqattar deneniń ártúrli aımaqtarynda: aýyz, keýde qýysy, arqa, qoltyq, bilek, jambas, tize jáne ıyq aımaqtarynda bolǵan. Barlyq jaraqattar tiri kezinde salynǵany anyqtaldy.
Is boıynsha sot talqylaýy 2024 jyldyń 18 jeltoqsanynda bastalǵan. Aldaǵy sot otyrystarynda tergeý materıaldary men kýágerlerdiń aıǵaqtary qaralýy josparlanǵan.
Aıyptalýshy Aıtjan Áýbákirov óziniń kinásizdigin dáleldeýge tyrysýda. Bul is Qańtar oqıǵasy kezinde kúshtik qurylymdar tarapynan jasalǵan áreketterge qatysty qoǵamnyń erekshe nazarynda tur.
