رەسەيلىك مارگاريتا سيمونيان «ەحو» راديوستانتسياسىنا بەرگەن سۇحباتىندا قازاقستانعا اسكەر جىبەرۋ ارقىلى «بارمالەيلەرمەن» كۇرەسۋگە دايىن ەكەنىن ايتىپ، كەزەكتى رەت داۋلى مالىمدەمە جاسادى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
«مەن ۋكراينادا، سيريادا جانە ەگەر تاعى دا شاقىرسا، قازاقستانداعى قانداي دا ءبىر "بارمالەيلەرمەن" كۇرەسۋ ءۇشىن (سوعىسۋدى) وزىمىزگە مۇمكىندىك بەرە الاتىن بولساق، وتە باقىتتى بولار ەدىم»، – دەدى سيمونيان.
ال “بارمالەي” كورنەي چۋكوۆسكيدىڭ دوكتور ايبوليت تۋرالى ەرتەگىلەرىندەگى زۇلىم، توناۋشى ءارى كاننيبال كەيىپكەر رەتىندە تانىمال.
قازتاگ رەداكتسياسى «روسسيا سەگودنيا» اگەنتتىگىنىڭ باس رەداكتورى بولىپ تابىلاتىن سيمونيانعا سۇراقتار جولداپ، ونىڭ «بارمالەي» دەپ كىمدى مەڭزەگەنىن جانە 2022 جىلعى قاڭتار وقيعالارىنا قاتىستى پىكىرىن ناقتىلاۋدى سۇرادى.
بۇل سيمونياننىڭ قازاقستانعا قاتىستى العاشقى جانجال تۋدىرۋى ەمەس. 2022 جىلعى اقپاندا قازاقستاننىڭ سەپاراتيستىك «دنر» مەن «لنر»-ءدى مويىنداماۋ تۋرالى مالىمدەمەسىنە ول نارازىلىق ءبىلدىرىپ، مۇنى «العىسسىزدىق» دەپ اتاعان ەدى.
«ءبىز ولاردى نە ءۇشىن قۇتقاردىق سوندا؟» – دەپ، ول قاڭتار وقيعالارى كەزىندە قازاقستانعا ۇقشۇ كۇشتەرىن ەنگىزۋدى مەڭزەگەن بولاتىن.
دەپۋتات ايدوس سارىم سيمونياننىڭ بۇل مالىمدەمەسىنە قاتىستى پىكىر ءبىلدىردى.
"قۇدايعا شۇكىر، مارگاريتا سيمونيان – قازاقستاننىڭ سىرتقى ساياساتىنا اسەر ەتەتىن تۇلعا ەمەس، ول مينيستر دە، دەپۋتات تا ەمەس", – دەدى.
سيمونياننىڭ كۇيەۋى، تاعى ءبىر رەسەيلىك ناسيحاتشى تيگران كەوسايان دا قازاقستانعا قارسى پىكىرلەرىمەن تانىمال. 2022 جىلعى ساۋىردە ونىڭ قازاقستانعا قوقان-لوقى جاساپ، قورلاعان سوزدەرى ەل ىشىندە جانە حالىقارالىق دەڭگەيدە نارازىلىق تۋدىرعان بولاتىن.
