قازاقستان ۇلتتىق بانكى 2024 جىلدىڭ 25 جەلتوقسانىنان باستاپ جاڭا ديزاينداعى 2000 تەڭگەلىك بانكنوتتاردى اينالىمعا شىعارادى، دەپ حابارلايدى "ادىرنا" ۇلتتىق پورتالى.
ۇلتتىق بانكتىڭ مالىمەتىنشە، بۇل – «ساق ءستيلى» سەرياسىنداعى ءۇشىنشى بانكنوت.
«ول ءداستۇرلى قازاق ويۋ-ورنەگىنىڭ باستاۋىنا اينالعان «ساق ءستيلى» ەلەمەنتتەرىنە نەگىزدەلگەن جانە كوشپەلى مادەنيەتتەن قازىرگى زامانعى قازاقستانعا دەيىنگى ەل مۇراسىن بەينەلەيدى»، – دەپ اتاپ ءوتتى ۇلتتىق بانك.
اتالعان بانكنوتتار جاپپاي اينالىمعا 2025 جىلدىڭ ەكىنشى توقسانىندا تۇسەدى. سەبەبى ولاردى ەلدىڭ بارلىق وڭىرلەرىنە جەتكىزۋ جانە بانكوماتتار، تەرمينالدار، كاسسالىق تەحنيكاعا بەيىمدەۋ ءۇشىن قوسىمشا ۋاقىت قاجەت.
«جاڭا ديزاينداعى 2000 تەڭگەلىك بانكنوتتار 2024 جىلدىڭ 25 جەلتوقسانىنان باستاپ اينالىمعا ەنگىزىلىپ، 18 اي ىشىندە 2012 جىلعى ۇلگىدەگى بانكنوتتاردى (ەسكى ۇلگىدەگى بانكنوتتار) بىرتىندەپ اۋىستىرادى. وسىلايشا، ەسكى ۇلگىدەگى بانكنوتتار 1,5 جىل بويى بىرتىندەپ اينالىمنان الىناتىن بولادى. بۇل كەزەڭدە تۇرعىندارعا ەسكى ۇلگىدەگى بانكنوتتاردى ەكىنشى دەڭگەيلى بانكتەردە نەمەسە ۇلتتىق بانكتىڭ فيليالدارىندا جاڭاسىنا وزدىگىنەن اۋىستىرۋدىڭ قاجەتى جوق»، – دەپ ءتۇسىندىردى بانك وكىلدەرى.
ەسكى جانە جاڭا ۇلگىدەگى بانكنوتتاردىڭ پاراللەلدى اينالىمى 2024 جىلدىڭ 25 جەلتوقسانىنان 2026 جىلدىڭ 24 ماۋسىمىنا دەيىن جالعاسادى.
پاراللەلدى اينالىم كەزەڭى اياقتالعاننان كەيىن، ياعني 2026 جىلدىڭ 25 ماۋسىمىنان باستاپ، بارلىق بانكتەر مەن قازپوشتا ەسكى ۇلگىدەگى بانكنوتتاردى جاڭا ۇلگىدەگى بانكنوتتارعا ءۇش جىل ىشىندە – 2029 جىلدىڭ 25 ماۋسىمىنا دەيىن اۋىستىرادى.
ۇلتتىق بانكتىڭ فيليالدارى ەسكى ۇلگىدەگى بانكنوتتاردى مەرزىمسىز قابىلدايدى.
قولدانىستاعى زاڭدى تولەم قۇرالى بولىپ تابىلاتىن بانكنوتتار مەن مونەتالاردى قابىلداۋدان باس تارتۋ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس اكىمشىلىك قۇقىق بۇزۋشىلىق بولىپ سانالادى، دەپ ەسكە سالدى ۇلتتىق بانك.
