ەلدەگى مەملەكەتتىك مەكتەپتەردە ديرەكتور لاۋازىمىنا 438 بوس ورىن بار. بۇل تۋرالى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا دەپۋتاتتىق ساۋالعا بەرگەن جاۋابىندا مەكتەپ ديرەكتورلارى اراسىنداعى كادر تاپشىلىعىنا قاتىستى ستاتيستيكانى جاريالادى، دەپ حابارلايدى "ادىرنا".
ءمينيستردىڭ مالىمەتىنشە، سوڭعى ءۇش جىلدا مەكتەپ ديرەكتورلارىنىڭ بوس ورىندارى كەزەڭ-كەزەڭىمەن ازايىپ كەلەدى. ماسەلەن، 2024 جىلى – 935, ال 2025 جىلى – 830 بوس جۇمىس ورنى تىركەلگەن.
"قازىرگى تاڭدا مەملەكەتتىك مەكتەپتەردە 438 ديرەكتورلىق لاۋازىم بوس تۇر", – دەلىنگەن جاۋاپتا.
كادر تاپشىلىعىنىڭ باسىم بولىگى اۋىلدىق مەكتەپتەرگە تيەسىلى. اتاپ ايتقاندا، 385 بوس ورىن – اۋىل مەكتەپتەرىندە، ال 53 ۆاكانسيا – قالالىق مەكتەپتەردە.
سونداي-اق ايدا بالاەۆا مەكتەپ ديرەكتورلارىن ىرىكتەۋ جانە تاعايىنداۋ ماسەلەلەرى وڭىرلەردەگى كوشپەلى كەڭەستەردە قارالعانىن اتاپ ءوتتى.
وسىعان بايلانىستى وقۋ-اعارتۋ مينيسترلىگىنە شاعىن جيناقتى مەكتەپ ديرەكتورلارى ءۇشىن بىلىكتىلىك تالاپتارى مەن روتاتسيا مەرزىمدەرىن قايتا قاراۋ تاپسىرىلعان.
بۇعان دەيىن مەملەكەتتىك مەكتەپتەر، جوعارى وقۋ ورىندارى مەن مەديتسينالىق ۇيىمدار باسشىلارىن كونكۋرستىق نەگىزدە ىرىكتەۋ جوسپارلانىپ وتىرعانى حابارلانعان ەدى.
