تارازدان شىققان تارلاندى جەرلەستەرى قۇرمەتتەدى

608

تاراز توپىراعىنان تۇلەپ ۇشىپ، ءيسى قازاققا تانىلعان ازاماتتار جەتەرلىك. سولاردىڭ ءبىرى ءھام بىرەگەيى مەملەكەت جانە قوعام قايراتكەرى مىرزاتاي جولداسبەكوۆ.

جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ ۇيىمداستىرۋىمەن ش.ءۋاليحانوۆ اتىنداعى وبلىستىق عىلىمي-امبەباپ كىتاپحاناسىندا فيلولوگيا عىلىمدارىنىڭ دوكتورى، پروفەسسور مىرزاتاي جولداسبەكوۆپەن رۋحاني كەزدەسۋ ءوتتى. باسقوسۋدا اڭگىمە ارقاۋىنا اينالعان تاقىرىپ – وبلىستىڭ 80 جىلدىعىنا وراي جارىق كورەتىن كوپتومدىقتىڭ دايىندالۋ بارىسى بولدى.

بيىل جامبىل وبلىسى ءوزىنىڭ 80 جىلدىق مەرەيتويىن اتاپ ءوتىپ جاتىر. وسى مەرەيتوي قارساڭىندا جامبىل وبلىسىنىڭ 80 جىلدىق تاريحىنان سىر شەرتەتىن كوپتومدىق شىعارۋ جوسپارلانىپ وتىر.

وبلىستىق مەملەكەتتىك ءارحيۆتىڭ مۇراعاتتانۋشىسى ماقۇلبەك رىسداۋلەتتىڭ ايتۋىنشا، وبلىس اكىمى اسقار مىرزاحمەتوۆتىڭ باستاماسىمەن دايىندالىپ جاتقان كوپتومدىقتىڭ العاشقى لەگى دايىندالىپ، باسپاعا جىبەرىلگەن. ارداگەر جۋرناليست اتالعان كوپتومدىق وبلىستىڭ 80 جىلدىق مەرەيتويىنا ارنالعان ايرىقشا تارتۋ بولاتىنىن ەسكەرتتى.

ال مىرزاتاي جولداسبەكوۆ بولسا كوپتومدىقتى ازىرلەۋ بارىسىندا اسىعىستىققا جول بەرۋگە بولمايتىنىن جەرلەستەرىنە ايتتى. سوندىقتان دا ول بۇل ىستە اسقان جاۋاپكەرشىلىك تانىتۋ كەرەكتىگىن جەتكىزدى.

«جاس ۇرپاق ەلدىڭ، ءوڭىردىڭ تاريحىن، ءوزىنىڭ ءتۇپ تامىرىن ءبىلىپ ءجۇرۋى ءتيىس. سوندىقتان سىزدەردىڭ جاساپ جاتقاندارىڭىز – العىس ايتۋعا، قۇرمەت كورسەتۋگە تۇرارلىق ىزگىلىكتى باستاما. بىراق اسىقپاۋ كەرەك. جان-جاقتى سارالاپ، جەتى رەت ولشەپ، ءبىر رەت كەسكەن ءجون. مالىمەتتەردىڭ بۇرمالانباۋىنا نازار اۋدارىڭىزدار. بىلمەگەندى سۇراۋدىڭ ەشقانداي دا سوكەتتىگى جوق. بىلمەگەندەرىڭىز بولسا اقىل-كەڭەس ايتىپ، كورگەن-تۇيگەنىممەن، قولىمدا بار دەرەكتەرمەن بولىسۋگە دايىنمىن»، – دەدى مىرزاتاي جولداسبەكوۆ.

كەزدەسۋدە كەلەلى كەڭەس ايتقان عالىم ءوزىنىڭ بىرقاتار قۇندى ەڭبەكتەرىن ش.ءۋاليحانوۆ اتىنداعى وبلىستىق عىلىمي-امبەباپ كىتاپحاناسىنىڭ قورىنا سىيعا تارتتى.

بۇدان كەيىن ول تاراز قالاسىنداعى «ءمولدىر» مەيرامحاناسىندا ءوڭىردىڭ بەلگىلى تۇلعالارىمەن، زيالى قاۋىممەن، مادەنيەت پەن ونەر، ادەبيەت، رۋحانيات سالاسىنىڭ وكىلدەرىمەن جۇزدەستى. جيىندا وبلىس اكىمى اسقار مىرزاحمەتوۆ ءسوز سويلەپ، ەلىمىز تاۋەلسىزدىگىنىڭ قالىپتاسۋ جىلدارىندا ەلباسىنىڭ سەنىمدى سەرىگى بولعان، كورنەكتى عالىم مىرزاتاي جولداسبەكوۆتىڭ مەملەكەتتىڭ دامۋىنا قوسقان زور ۇلەسىنە توقتالىپ، جەرلەستەرى اتىنان دەنىنە ساۋلىق، وتباسىنا اماندىق، جۇمىستارىنا تابىس تىلەدى.

سونداي-اق جيىنعا قاتىسقانداردىڭ بارلىعىنا م.جولداسبەكوۆتىڭ «تاۋەلسىزدىك تاعىلىمى»، «كۇندەرىمنىڭ كۋاسى»، «كىندىگىمدى كەسكەن جۇرت»، «اسىلدارىم»، «شىركىن، داۋرەن!» كىتاپتارى تاراتىلدى.

«ادىرنا»

ۇلتتىق پورتالى

پىكىرلەر