Tarazdan shyqqan tarlandy jerlesteri qurmettedi

582

Taraz topyraǵynan túlep ushyp, ısi qazaqqa tanylǵan azamattar jeterlik. Solardyń biri hám biregeıi memleket jáne qoǵam qaıratkeri Myrzataı Joldasbekov.

Jambyl oblysy ákimdiginiń mádenıet, arhıvter jáne qujattama basqarmasynyń uıymdastyrýymen Sh.Ýálıhanov atyndaǵy oblystyq ǵylymı-ámbebap kitaphanasynda fılologııa ǵylymdarynyń doktory, professor Myrzataı Joldasbekovpen rýhanı kezdesý ótti. Basqosýda áńgime arqaýyna aınalǵan taqyryp – oblystyń 80 jyldyǵyna oraı jaryq kóretin kóptomdyqtyń daıyndalý barysy boldy.

Bıyl Jambyl oblysy óziniń 80 jyldyq mereıtoıyn atap ótip jatyr. Osy mereıtoı qarsańynda Jambyl oblysynyń 80 jyldyq tarıhynan syr shertetin kóptomdyq shyǵarý josparlanyp otyr.

Oblystyq memlekettik arhıvtiń muraǵattanýshysy Maqulbek Rysdáýlettiń aıtýynsha, oblys ákimi Asqar Myrzahmetovtiń bastamasymen daıyndalyp jatqan kóptomdyqtyń alǵashqy legi daıyndalyp, baspaǵa jiberilgen. Ardager jýrnalıst atalǵan kóptomdyq oblystyń 80 jyldyq mereıtoıyna arnalǵan aıryqsha tartý bolatynyn eskertti.

Al Myrzataı Joldasbekov bolsa kóptomdyqty ázirleý barysynda asyǵystyqqa jol berýge bolmaıtynyn jerlesterine aıtty. Sondyqtan da ol bul iste asqan jaýapkershilik tanytý kerektigin jetkizdi.

«Jas urpaq eldiń, óńirdiń tarıhyn, óziniń túp tamyryn bilip júrýi tıis. Sondyqtan sizderdiń jasap jatqandaryńyz – alǵys aıtýǵa, qurmet kórsetýge turarlyq izgilikti bastama. Biraq asyqpaý kerek. Jan-jaqty saralap, jeti ret ólshep, bir ret kesken jón. Málimetterdiń burmalanbaýyna nazar aýdaryńyzdar. Bilmegendi suraýdyń eshqandaı da sókettigi joq. Bilmegenderińiz bolsa aqyl-keńes aıtyp, kórgen-túıgenimmen, qolymda bar derektermen bólisýge daıynmyn», – dedi Myrzataı Joldasbekov.

Kezdesýde keleli keńes aıtqan ǵalym óziniń birqatar qundy eńbekterin Sh.Ýálıhanov atyndaǵy oblystyq ǵylymı-ámbebap kitaphanasynyń qoryna syıǵa tartty.

Budan keıin ol Taraz qalasyndaǵy «Móldir» meıramhanasynda óńirdiń belgili tulǵalarymen, zııaly qaýymmen, mádenıet pen óner, ádebıet, rýhanııat salasynyń ókilderimen júzdesti. Jıynda oblys ákimi Asqar Myrzahmetov sóz sóılep, elimiz Táýelsizdiginiń qalyptasý jyldarynda Elbasynyń senimdi serigi bolǵan, kórnekti ǵalym Myrzataı Joldasbekovtiń memlekettiń damýyna qosqan zor úlesine toqtalyp, jerlesteri atynan denine saýlyq, otbasyna amandyq, jumystaryna tabys tiledi.

Sondaı-aq jıynǵa qatysqandardyń barlyǵyna M.Joldasbekovtiń «Táýelsizdik taǵylymy», «Kúnderimniń kýási», «Kindigimdi kesken jurt», «Asyldarym», «Shirkin, dáýren!» kitaptary taratyldy.

«ADYRNA»

ulttyq portaly

Pikirler