رەسەي فەدەراتسياسىنان اسا ءىرى مولشەردە الاياقتىق جاساعان وزبەكستان ازاماتى ەكستراديتسيالاندى. ول الماتىلىقتاردى 3,7 ملرد تەڭگەگە الداپ سوقتى دەگەن كۇدىككە ءىلىنىپ وتىر. بۇل تۋرالى بۇگىن، 23 جەلتوقساندا باس پروكۋراتۋرا ايتتى، دەپ حابارلايدى «ادىرنا» ءتىلشىسى.
ەر ادام 2005-2007 جىلدار ارالىعىندا الماتى قالاسىنداعى قۇرىلىس كومپانياسىندا بۋحگالتەر بولىپ جۇمىس ىستەگەن.
«ول ۇلەستىك قۇرىلىسقا قاتىسۋشىلاردان اقشا قابىلداعان. تۇرعىن ءۇي كەشەنىنىڭ اياقتالماعان قۇرىلىس وبەكتىسى بويىنشا جالعان تۇبىرتەكتەر جازعان»، - دەلىنگەن حابارلامادا.
ەسەپشىنىڭ جانە ونىڭ سىبايلاستارىنىڭ زاڭسىز ارەكەتىنەن سوڭ الماتى قالاسىنىڭ 80-نەن استام تۇرعىنى 3,7 ملرد تەڭگە شىعىنعا ۇشىراعان. مۇنداي زاڭ بۇزۋشىلىقتار ءۇشىن ەسەپشىنىڭ ءبىر سىبايلاسى سوتتالعان. ال ەسەپشى ءىزىن سۋىتىپ، قاشىپ كەتكەن. بۇدان سوڭ وعان قۇزىرلى ورگان حالىقارالىق ىزدەۋ جاريالادى.
«وتكەن جىلدىڭ جەلتوقسان ايىندا ىزدەۋدە جۇرگەن ادام رەسەي فەدەراتسياسىنىڭ كراسنودار ولكەسىندە ۇستالدى، سودان كەيىن قازاقستان رەسپۋبليكاسى باس پروكۋراتۋراسىنىڭ سۇراۋ سالۋى بويىنشا قازاقستانعا ەكستراديتسيالاندى. قازىرگى ۋاقىتتا كۇدىكتى تەرگەۋ يزولياتورىنا قامالدى. ايىپتاعان قىلمىس جاساعانى ءۇشىن مۇلكى تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان»، - دەلىنگەن باس پروكۋراتۋرا حابارلاماسىندا.
