جەتىسۋ وبلىسى قۇرىلعاننان بەرى جوندەۋ مەن جاڭا قۇرىلىس جۇرگىزۋدىڭ ارقاسىندا وبەكتىلەردى جاڭارتۋ 50%-عا جەتتى. مىسالى، ءبىلىم بەرۋ سالاسىندا 5310 ورىندى 15 جاڭا مەكتەپ پايدالانۋعا بەرىلىپ، 19 نىسان كۇردەلى جوندەۋدەن ءوتتى. ال دەنساۋلىق ساقتاۋ سالاسىندا 98 نىسان ىسكە قوسىلدى. بۇل تۋرالى بۇگىن قر پرەزيدەنتى جانىنداعى ورتالىق كوممۋنيكاتسيالار قىزمەتى الاڭىندا وتكەن بريفينگ بارىسىندا جەتىسۋ وبلىسىنىڭ اكىمى بەيبىت يساباەۆ ايتتى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بەيبىت يساباەۆ ءوز بايانداماسىندا الەۋمەتتىك ينفراقۇرىلىمداردى جاقسارتۋدىڭ جاي-كۇيىنە توقتالدى. ونىڭ ايتۋىنشا، «جايلى مەكتەپ» ۇلتتىق جوباسىنىڭ اياسىندا 2023 جىلى باستالعان 1800 ورىندى 2 مەكتەپتىڭ بىرەۋى بيىل قولدانىسقا بەرىلسە، ەكىنشىسىنىڭ قۇرىلىسى كەلەسى جىلى دا جالعاسادى. جالپى 2025 جىلى 7 مەكتەپ سالۋ جوسپارلانعان. سونىڭ ناتيجەسىندە جوندەۋگە جاتاتىن 95 مەكتەپتىڭ 38-ءى نەمەسە 40%-ى جاڭارتىلادى.
ال دەنساۋلىق ساقتاۋ سالاسىندا سوڭعى ءۇش جىلدا 98 نىسان پايدالانۋعا بەرىلسە، سونىڭ 31-ءى جاڭادان سالىنعان, 61 بلوكتى-ءمودۋلدى مەديتسينالىق كەشەندەر ورناتىلىپ، 6 نىسان كۇردەلى جوندەۋدەن ءوتتى. بيىلعى جىلدىڭ وزىندە 51 نىسان بوي كوتەرگەن، سونىڭ 25-ءى جاڭا قۇرىلىس، 26-سى – بلوكتى-ءمودۋلدى كونسترۋكتسيا.
– ايتا كەتۋ كەرەك، ءبىزدىڭ وبلىس بلوكتى-ءمودۋلدى مەديتسينالىق كەشەندەردى ورناتۋ تاجىريبەسىن العاشقىلاردىڭ ءبىرى بولىپ كەڭىنەن قولدانا باستادى. كەلەسى جىلى تاعى 69 نىساندى قولدانىسقا بەرۋ جوسپارلانۋدا. قابىلدانعان شارالاردىڭ ناتيجەسىندە وبلىستا جوندەۋگە جاتاتىن 292 دەنساۋلىق ساقتاۋ نىسانىنىڭ 167-ءى نەمەسە 57,2% جاڭارتىلادى، - دەدى ب. يساباەۆ.
مادەنيەت سالاسىندا 2022-2024 جىلدارى 12 مادەنيەت ءۇيى پايدالانۋعا بەرىلىپ، 10 نىسان كۇردەلى جوندەۋدەن وتكەن. كەلەسى جىلى تاعى 7 نىسان پايدالانۋعا بەرىلىپ, جاڭارۋ دەڭگەيى 33,3%-عا جەتەدى.
ال سپورت سالاسىنا كەلسەك، وبلىس اكىمىنىڭ مالىمەتىنشە، دەنە شىنىقتىرۋ-ساۋىقتىرۋ كەشەندەرى، سپورت كەشەندەرى، كۇرەس زالدارى، ستاديون سياقتى جالپى 18 نىسان ىسكە قوسىلىپ, 10 بلوكتى-ءمودۋلدى سپورت كەشەنى ورناتىلدى. سونىمەن قاتار تالدىقورعاندا قازاقستاندا بالاماسى جوق «جەتىسۋ» ۆولەيبول ورتالىعى جانە ينۆەستور ەسەبىنەن سپورتشىلارعا ارناپ سالىنعان ءتورت قاباتتى تۇرعىن ءۇي پايدالانۋعا بەرىلدى. وعان قوسا جاقىندا ينۆەستوردىڭ قارجىسىنا ۇستەل تەننيسى ورتالىعى اشىلدى.
- سونىڭ ناتيجەسىندە نىسانداردىڭ 74,4% جاڭارتىلىپ، حالىقتى سپورتتىق ينفراقۇرىلىممەن قامتاماسىز ەتۋ 1000 ادامعا شاققاندا 64%-عا جەتتى، - دەدى ءوز سوزىندە وبلىس اكىمى.
