ەكىباستۇزدا ەل پرەزيدەنتى قاسىم-جومارت توقاەۆتىڭ 2023 جىلدىڭ تامىز ايىندا كەنشىلەر قالاسىنا كەلگەن كەزىندە بەرگەن تاپسىرماسى بويىنشا سالىنعان «سامعاۋ» بالالار شىعارماشىلىعى ورتالىعىنىڭ اشىلۋ سالتاناتى ءوتتى.
جوبا پاۆلودار وبلىسىنىڭ ەكى ءىرى ونەركاسىپتىك كومپانياسىنىڭ: ERG جانە KazMineralsBozshakol توپتارىنىڭ دەمەۋشىلىك قاراجاتى ەسەبىنەن جۇزەگە اسىرىلدى. جوبانىڭ جالپى قۇنى 5,3 ملرد. تەڭگە.
جاڭا نىساننىڭ جۇمىسى ەكىباستۇز قالاسىنىڭ بالالارىن قوسىمشا ءبىلىم بەرۋمەن قامتۋدى 70%-عا نەمەسە 16 مىڭنان استام وقۋشىعا دەيىن ۇلعايتۋعا مۇمكىندىك بەرەدى.
جالپى اۋدانى 7200 شارشى مەتردى قۇرايتىن زاماناۋي ورتالىقتا 9 مىڭنان استام بالا، ونىڭ ىشىندە ەرەكشە قاجەتتىلىكتەرى بار بالالار 12 باعىت بويىنشا قوسىمشا ءبىلىم الۋعا، ۋاقىتتارىن قىزىقتى وتكىزۋگە، ءوز-وزدەرىن دامىتۋعا مۇمكىندىك الدى. ورتالىق ەرەكشە قاجەتتىلىكتەرى بار بالالارعا تولىقتاي بەيىمدەلگەن، ليفت جانە كوتەرگىش قۇرىلعىلارمەن، تيفلو- جانە سۋردوقۇرىلعىلارمەن جابدىقتالعان.
- مەن بۇگىن مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن سالىنعان جاڭا يننوۆاتسيالىق «سامعاۋ» بالالار شىعارماشىلىعى ورتالىعىنىڭ اشىلۋ سالتاناتىنا قاتىسقانىما وتە قۋانىشتىمىن. «سامعاۋ» كەنشىلەر قالاسىنىڭ بالالارى مەن جاستارىن تارتاتىن ورتالىق بولاتىنىنا سەنىمدىمىن. بۇل سىزدەر ءۇشىن جاڭا دوستار تابۋعا، ۇيرەنۋگە جانە دامۋعا، سونداي-اق، ۋاقىت وتكىزۋگە بولاتىن ەكىنشى ۇيلەرىڭىز بولسىن، - دەدى ايماق باسشىسى.
سونداي-اق، اسايىن بايحانوۆ بالالار مەن جاستاردىڭ ۇيلەسىمدى دامۋى ءۇشىن اسا قاجەتتى جوبانى ىسكە اسىرۋعا جانە نىساننىڭ قۇرىلىسىنا قاتىسقانداردىڭ بارلىعىنا العىسىن ءبىلدىردى.
عيماراتتىڭ ءبىرىنشى قاباتىندا بي زالى، تەاتردىڭ جاتتىعۋ زالى، جەكە ۆوكال مەن مۋزىكا ساباقتارىنا ارنالعان بولمەلەر جانە 275 ورىندىق ۇلكەن اۋديتوريا ورنالاسقان. بالالار ورتالىق جۇمىسىنىڭ شىعارماشىلىق باعىتتارىنان حورەوگرافيا (حالىقتىق، زاماناۋي جانە كلاسسيكالىق بيلەر), تەاتر ونەرى، ۆوكال جانە حور ءانى نەمەسە اسپاپتىق شەبەرلىك (دومبىرا، قوبىز، گيتارا، ماندولينا، داۋىلپاز، اساتاياق، شەرتپە) بويىنشا ساباقتاردى تاڭداي الادى.
ەكىنشى قاباتتا جاسىل تەحنولوگيالار ورتالىعىنىڭ عىلىمي-بيولوگيالىق زەرتحاناسى (گيدرو جانە ەكوپونيكا) جانە لاندشافتتىق ساۋلەت پەن فلوريستيكالىق ديزاين ستۋديالارى، سونداي-اق، پىكىرتالاس ورتالىعى، مەديا ورتالىق (دىبىس جازۋ ستۋدياسى، تەلەستۋديا، فوتوگرافيا اكادەمياسى، جاس بلوگەر ستۋدياسى، كوۆوركينگ ورتالىعى) جانە ءسان ستۋدياسى (ماكياج جانە كوستيۋم سۋرەتشىسى، ينتەرەر ديزاينى) ورنالاسقان.
ءۇشىنشى قابات تولىعىمەن روبوتوتەحنيكا جانە كومپيۋتەرلىك مودەلدەۋ، عارىشتىق راديوبايلانىس جانە راديوتەحنيكا كلۋبتارىن، ستەم جانە لەگو زەرتحانالارىن، ۇۇا كلۋبىن (ۇشقىشسىز ۇشۋ اپپاراتى) قوسا العاندا IT-تەحنولوگيالارعا، سونداي-اق، بالالار ءپىشىم مەن تىگىندى، مودەلدەۋدى، كەراميكانى، بەينەلەۋ ونەرىمەن اسپازدىق ونەردى ۇيرەنۋگە مۇمكىندىك بەرەتىن كوركەمدىك-قولدانبالى بلوكقا بەرىلدى.
سونىمەن قاتار، ورتالىقتا اتا-انالار مەن بالالارعا ارنالعان پسيحولوگيالىق-پەداگوگيكالىق قولداۋ كابينەتى، ۇستەل تەننيسىنە ارنالعان ايماقتار، ەمدىك دەنە شىنىقتىرۋ جانە جاتتىعۋ زالى جۇمىس ىستەيتىن بولادى.
بالالار دا، اتا-انالار دا ورتالىقتىڭ اشىلۋىنا جانە ءارتۇرلى تەگىن ساباقتاردىڭ بولعانىنا قۋانىشتى.
- بالالارىمىزدىڭ جاڭا نارسەنى ۇيرەنىپ، ءبىلىم الۋلارى ءۇشىن قالامىزدا وسىنداي ورتالىقتىڭ اشىلۋىن اسىعا كۇتتىك. ءبىزدىڭ ءوتىنىشىمىزدى تىڭداپ، قالا ءۇشىن، بالالار ءۇشىن جانە ولاردىڭ بولاشاعى ءۇشىن وسىنداي ورتالىق سالۋعا تاپسىرما بەرگەنى ءۇشىن پرەزيدەنتىمىزگە وتە ريزامىز. اتسالىسقان بارشا جانعا العىس بىلدىرەمىن. شىعارماشىلىق ۇيىرمەگە جازىلۋدى جوسپارلاعانبىز، بىراق، مۇندا كوپتەگەن قىزىقتى ۇيىرمەلەر بار ەكەن، ەندى باسقا دا باعىتتاردى كورۋدى ويلاپ وتىرمىز، – دەپ ەكىباستۇز قالاسىنىڭ تۇرعىنى ايانا سماعۇلوۆا ءوزىنىڭ قۋانىشىمەن ءبولىستى.
نىساننىڭ قۇرىلىسى 2023 جىلدىڭ قازان ايىندا باستالىپ، 2024 جىلى اياقتالدى. ورتالىقتا جۇمىس ىستەۋگە 50-دەن استام قوسىمشا ءبىلىم بەرۋ پەداگوگتارى تارتىلدى.
بۇگىنگى تاڭدا وڭىردە وسكەلەڭ ۇرپاقتىڭ ۇيلەسىمدى دامۋى ءۇشىن بارلىق جاعداي جاسالۋدا. بۇعان دەيىن 800 بالاعا ارنالعان شىعارماشىلىق ورتالىق ەرتىس اۋدانىندا اشىلعان بولاتىن. قىركۇيەك ايىندا پاۆلودار قالاسىندا «التىن ساقا» بالالار شىعارماشىلىعى جانە دەمالىس ورتالىعى اشىلدى.
