15 جەلتوقسان كۇنى تالعار قالاسىندا اكىم سايلاۋى ءوتتى. سايلاۋ قورىتىندىسى بويىنشا ارىستانبەك ابىلقايىرۇلى تالعار قالاسىنىڭ اكىمى بولىپ سايلاندى، دەپ حابارلايدى «ادىرنا» ءتىلشىسى.
اكىمدىكتىڭ مالىمەتىنشە، داۋىس بەرۋگە 12 875 سايلاۋشى قاتىسقان.
«ارىستانبەك ابىلقايىرۇلى ءۇشىن سايلاۋشىلاردىڭ 9071 داۋىسى بەرىلدى. ال جانىبەك كادەنوۆ 1 875, الىبەك رامازانوۆ 1 140 داۋىس جينادى. 182 سايلاۋشى بارلىعىنا قارسى داۋىس بەردى»،— دەلىنگەن حابارلامادا.
ارىستانبەك ابىلقايىرۇلى 1983 جىلى دۇنيەگە كەلگەن. «تالعار تۇرعىن ءۇي» جشس ديرەكتورى، تالعار قالاسىنىڭ تۇرعىنى. ول Amanat پارتياسىنىڭ اتىنان ۇسىنىلعان بولاتىن.
ەسكە سالايىق، قالانىڭ بۇرىنعى باسشىسى باقىت كۇرىشبەكوۆ 16 جاستاعى شەرزات پولاتتىڭ ولىمىنەن كەيىن قىزمەتىنەن بوساتىلعان ەدى.
بۇعان دەيىن قالا بويىنشا اكىمدىككە 9 ۇمىتكەر تىركەلگەن بولاتىن. الايدا ولاردىڭ ەكەۋى تالاپقا ساي كەلمەسە، قالعان تورتەۋى كەيىن ءوز كانديداتۋراسىن الىپ تاستادى.
