يسلام ابىشەۆ جانە دۇنيەجۇزىلىك كۇرەس فەدەراتسياسىنىڭ ۆيتسە-پرەزيدەنتى سەرىك تۇكەەۆتىڭ ادۆوكاتى ەرلان ماكەنوۆتىڭ پىكىرىنشە، تەرگەۋ امالدارى ايىپتاۋ باعىتىندا بىرجاقتى ءجۇرىپ جاتىر. ونىڭ ايتۋىنشا، ايىپتالۋشىلارعا قىسىم جاسالعان.
تەرگەۋ قۇپيالىلىعىنا سۇيەنگەن ماكەنوۆ قىلمىستىق ءىستىڭ ءمان-جايىن ايتپادى، بىراق تەرگەۋ كەزىندە جانە تەرگەۋ سوتىندا ايىپتالۋشىلاردىڭ قورعالۋ قۇقىعى بۇزىلعانىن، ولاردىڭ نەگىزسىز قاماۋدا وتىرعانىن جەتكىزدى. نۇر-سۇلتاندا بۇگىن تاڭەرتەڭ وتكەن ءباسپاسوز جيىنىندا جازۋشى دۋلات يسابەكوۆ تەرگەۋ ورىندارى ءىستى سوزۋعا تىرىستى دەپ توپشىلادى.
سۋ رەسۋرستارى كوميتەتىنىڭ بۇرىنعى توراعاسى 63 جاستاعى يسلام ابىشەۆ جانە دۇنيەجۇزىلىك قازاقشا كۇرەس فەدەراتسياسىنىڭ ۆيتسە-پرەزيدەنتى سەرىك تۇكەەۆ 2019 جىلى 14 ناۋرىزدان بەرى تەرگەۋ يزولياتورىندا قاماۋدا وتىر.
جەمقورلىقپەن كۇرەس قىزمەتى سول ۋاقىتتا يسلام ابىشەۆ پەن ونىڭ "ىقتيمال سىبايلاسىنا" قاتىستى تەرگەۋ باستالعانىن حابارلاپ، ولاردىڭ "ەنشىلەس كومپانيادان 60 ميلليون تەڭگە كولەمىندە پارا الدى" دەگەن كۇدىككە ىلىنگەنىن مالىمدەگەن.
يسلام ابىشەۆتىڭ ادۆوكاتى ابزال قۇسپانوۆتىڭ ايتۋىنشا، سۋ رەسۋرستارى كوميتەتىنىڭ بۇرىنعى باسشىسىنا "پارا الۋعا وقتالۋ" بابى بويىنشا ايىپ تاعىلعان. قۇسپانوۆ سوزىنشە، ءىس ماتەريالدارىمەن تانىسقان ادۆوكاتتار "ستنەوگراممادان ابىشەۆتىڭ بەلگىلى ءبىر قاراجاتتى الماق بولعانى نەمەسە الۋعا كەلىسكەنى جايلى بىردە-ءبىر ءسوز تابا الماعان". ادۆوكاتتاردىڭ سوزىنشە، جەمقورلىقپەن كۇرەس قىزمەتى جاقىن ارادا قىلمىستىق ءىستى سوتقا جىبەرمەك. يسلام ابىشەۆ قۋعىنداۋدى كوميتەت باسشىسى بولىپ تۇرعان كەزدەگى جۇمىسىمەن بايلانىستىرعان.
ادۆوكاتتاردىڭ ايتۋىنشا، ايىپتالۋشىلار الداعى سوت وتىرىسىندا "قىلمىستىق ءىستى ۇيىمداستىرعان ادامداردىڭ اتى-ءجونىن اتاماق".
ال جەمقورلىقپەن كۇرەس قىزمەتى ادۆوكاتتاردىڭ قىسىم جايلى بۇگىنگى مالىمدەمەسىنە بايلانىستى تۇسىنىكتەمە بەرمەدى.
يسلام ابىشەۆ قىزمەت اتقارعان سۋ رەسۋرستارى كوميتەتى "كازۆودحوز" كاسىپورنىنىڭ قىزمەتىن رەتتەيدى. بۇل كاسىپورىننىڭ رەسپۋبليكالىق ماڭىزى بار سۋ نىساندارىن پايدالانۋ، ساقتاۋ، اۋىز سۋمەن قامتاماسىز ەتۋ جانە وزگە دە مىندەتتەرى بار.
يسلام ابىشەۆ اۋىل شارۋاشىلىعى مينيسترلىگىنە قاراستى سۋ رەسۋرستارى كوميتەتىنىڭ جەتەكشىسى بولىپ ەڭ العاش رەت 2012 جىلى اقپان ايىندا تاعايىندالعان. مۇندا 2013 جىلدىڭ شىلدە ايىنا دەيىن قىزمەت ەتكەن. 2014 جىلدىڭ ءساۋىر ايىندا قورشاعان ورتا جانە سۋ رەسۋرستارى مينيسترلىگىنە قاراستى سۋ رەسۋرستارى كوميتەتىن باسقارعان. وسى جىلى تامىز ايىندا اۋىل شارۋاشىلىعى مينيسترلىگىنە قاراستى سۋ رەسۋرستارى كوميتەتىنىڭ توراعاسى بولىپ تاعايىندالىپ، 2019 جىلى ناۋرىز ايىندا قاماۋعا الىنعانعا دەيىن سوندا قىزمەت ەتتى.
"ازاتتىق" راديوسى
