ءيزرايلدىڭ اۋە كۇشتەرى سيرياداعى 250-دەن استام اسكەري نىسانعا سوققى جاسادى. بۇل - اۋە كۇشتەرىنىڭ تاريحىنداعى ەڭ ءىرى سوققى وپەراتسيالارىنىڭ ءبىرى بولدى. بۇل تۋرالى 10 جەلتوقسان كۇنى ارميالىق راديو گالەي تساحال ءوزىنىڭ دەرەككوزدەرىنە سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ءيزرايلدىڭ قورعانىس ارمياسىنىڭ (تساحال) نىسانالارىنىڭ اراسىندا سيريانىڭ قۇلاتىلعان پرەزيدەنتى باشار اسادتىڭ ارمياسىنىڭ بازالارى بولدى. وندا ونداعان يسترەبيتەلدەر، ونداعان جەر ءۇستى ۇشاقتارى، زىمىراندى كەشەندەر، وندىرىستىك الاڭدار مەن زىمىران قويمالارى جويىلدى.
لوندونداعى سيريا ادام قۇقىقتارى جونىندەگى باقىلاۋ كەڭەسى (SOHR) مالىمدەگەندەي، اساد بيلىگى قۇلاعاننان بەرى يزرايل سيرياعا شامامەن 250 اۋە سوققىسىن جاساعان. قۇقىق قورعاۋشىلاردىڭ ايتۋىنشا، يزرايل ارمياسى سيرياداعى ماڭىزدى اسكەري نىسانداردى جويعان. ولاردىڭ اراسىندا اۋەجايلار، قارۋ-جاراق جانە وق-دارىلەر قويمالارى، سونداي-اق اسكەري زەرتتەۋ ورتالىقتارى بار.
SOHR سوققىلاردىڭ سيريانىڭ ءارتۇرلى ايماقتارىنا، سونىڭ ىشىندە دەير-ەز-زور، حاما جانە حومس پروۆينتسيالارىنا، داماسكقا جانە رەسەيدىڭ اسكەري بازالارى ورنالاسقان لاتاكياعا جاسالعانىن اتاپ ءوتتى. يزرايل لاتاكيا پورتىنداعى اۋە قورعانىس نىسانىنا سوققى جاساپ، سيريانىڭ اسكەري-تەڭىز كۇشتەرىنىڭ كەمەلەرىنە زيان كەلتىردى، دەپ ناقتىلادى قۇقىق قورعاۋشىلار.
AFP اقپارات اگەنتتىگى ءوزىنىڭ تىلشىسىنە سىلتەمە جاساپ، 10 جەلتوقساننىڭ تاڭىندا داماسكتا قاتتى جارىلىستار ەستىلگەنىن حابارلادى.
قارۋ-جاراق توپتارى قاراشا ايىنىڭ سوڭىندا باشار اسادتىڭ ۇكىمەتتىك كۇشتەرىنە قارسى اۋقىمدى شابۋىل باستادى. بىرنەشە كۇن ىشىندە ولار ەلدىڭ ەكىنشى ۇلكەن قالاسى الەپپونى باسىپ الىپ، باسقا دا ءىرى قالالاردى باقىلاۋعا الدى.
8 جەلتوقساندا سيرياداعى سۋننيتتىك راديكالدى يسلاميستىك "حايات تاحرير اش-شام" (حتش) ۇيىمى جەتەكشىلىك ەتەتىن كوتەرىلىسشىلەر اساد رەجيمىن قۇلاتقاندارىن مەملەكەتتىك تەلەارنا ارقىلى حابارلادى. بۇدان كەيىن اقش سيرياداعى "يسلام مەملەكەتى" لاڭكەستىك توبىنىڭ 75-تەن استام نىسانىنا سوققى جاسادى.
باشار اسادتىڭ پرەمەر-ءمينيسترى بولعان مۋحاممەد گازي ءال-دجالالي اسادپەن بايلانىسى جوق ەكەنىن جانە پرەزيدەنتتىڭ وتباسىمەن قايدا ەكەنىن بىلمەيتىنىن مالىمدەدى. كۇننىڭ سوڭىندا رەسەيدىڭ سىرتقى ىستەر مينيسترلىگى اسادتىڭ «پرەزيدەنتتىك قىزمەتىنەن كەتۋ تۋرالى شەشىم قابىلداعانىن» جانە سيريادان شىققانىن حابارلادى. تاسس كرەملدەگى دەرەككوزدەرىنە سىلتەمە جاساپ، باشار اسادتىڭ ماسكەۋدە ەكەنىن جازدى. سيريالىقتار ءوز ەلىندە جانە شەتەلدە اساد رەجيمىنىڭ قۇلاۋىن تويلاپ جاتىر.
