الماتى وبلىسى تالعار اۋدانىندا ءبىر توپ ادام قاتىسقان جانجالدان مەرت بولعان شەرزات پولاتتىڭ اعاسى نۇرعانات عايىپباەۆ تا ءولى تابىلدى. كامەلەتكە تولماعان بالاسىنان ايىرىلعان اۋلەتتە 2 اي 6 كۇننەن سوڭ تاعى ءبىر ءولىم ورىن الدى. Adyrna تىلشىلەرى تالعار ماڭىنداعى وقيعا بولعان اۋىلعا بارىپ، ءمان-جايدى ءبىلىپ قايتتى.
جەلتوقساننىڭ 9-ىندا نۇرعاناتتىڭ ءولىمى تۋرالى الماتى وبلىسىنىڭ پوليتسيا دەپارتامەنتى حابارلاپ، وقيعانى «سۋيتسيد» دەپ تىركەگەندەرىن ايتقان.
«وتە اۋىر سوققى»
اۋىل ماڭىنا كىرە بەرگەندە بىرنەشە پوليتسيا كولىكتەرى بايقالدى. اۋىلدا جەڭىل كولىكتەر قاراسى ادەتتەگىدەن كوپ بولدى. پوليتسەيلەر قارجاۋبايدىڭ قارا شاڭىراعىنا بارام دەگەن كولىكتى وتكىزبەي تۇردى.
ءۇي-ءىشى سۇحبات بەرۋدەن باس تارتتى. تەك شەرزات پولاتتىڭ قازاسى كەزىندە باق-قا سۇحبات بەرگەن باقىت رەيموۆا: «ەشكىم ينتەرۆيۋ بەرمەيدى. بىراق بۇل ءولىم سۋيتسيد ەمەس»، - دەپ پىكىر ءبىلدىردى. باقىت – شەرزاتتىڭ اكەسى قارجاۋبايدىڭ قارىنداسى. ال نۇرعانات – قارجاۋبايعا – ءىنى، شەرزاتقا نەمەرە اعا بولادى.
مارقۇمنىڭ كورشىلەرى قازالى ۇيگە تۇنگى 12-دە بارعاندارىن، ىزدەۋ جۇمىستارىنا ات سالىسقاندارىن ايتتى. الايدا ولار دا كوپ اشىلمادى. كەي كورشىلەرى جۋرناليستەرگە سۇحبات بەرۋدەن باس تارتىپ، كامەراعا تۇسىرمەۋدى سۇرادى.
قايعىلى وقيعا بولعان كۇنى تاڭەرتەڭ ازات اۋىلىندا قارالى اۋلەتكە جاردەمدەسىپ جۇرگەن ايتبەك امانگەلدى مەن شەرزات پولاتتىڭ ءولىمى بويىنشا ءىس قوزعاعان ادۆوكاتتار عانا تىلشىلەرگە ازا دا بولسا سۇحبات بەرگەن.
- قازىر ولاردى مازالاماۋ كەرەك. بۇل ولاردىڭ مورالدىق جاعدايى ءۇشىن وتە اۋىر سوققى بولدى. قاتارىنان ەكى ۇلكەن، اۋىر قايعىعا تاپ بولۋ وڭاي ەمەس. ءبىز بۇگىن تاڭەرتەڭ شەرزاتتىڭ اعاسى نۇرعاناتتىڭ قايتىس بولعانىن ەستىدىك. نۇرعاناتتىڭ دا، شارزاتتىڭ دا وتباسىلارى باستاپقى 40 كۇندە تەرگەۋمەن وتە تىعىز اينالىستى. پىشاق جاراقاتىنان كەيىن نۇرعانات تۇراقتى تۇردە تەكسەرۋلەر مەن ەمدەۋلەرگە بارىپ ءجۇردى، ال پسيحولوگتارمەن جۇمىس تەك 40 كۇننەن كەيىن باستالدى. پسيحولوگيالىق جاعدايى تاڭقالارلىق جاقسى بولدى، ونىڭ جوسپارلارى بار ەدى. ول وسى اۋداندا ەت ساتۋدى قايتا باستادى، تابىس تاپتى. دەگەنمەن، جاقىن ادامىن جوعالتقاندىقتان، جۇرەگىندە اۋىر دەرت قالدى. ول تەك اعاسىنىڭ ۇلى ەمەس، سونىمەن بىرگە ءوزىنىڭ تۋعان ۇلى سەكىلدى ەڭ جاقىن ادامىن جوعالتتى، – دەدى ايتبەك امانگەلدى.
مارقۇمنىڭ ءولى دەنەسى اۋىل ماڭىنداعى شەرزات جەرلەنگەن بەيىت اينالاسىنان تابىلعان. باق-تا پوليتسيا مالىمەتىنە سۇيەنىپ، نۇرعانات عايىپباەۆ ءوز-وزىنە قول سالعان دەگەن حابار تارادى. ول تۇنگى 23:30-دا ۇيىنەن شىعىپ، تۇنگى 12-دەن اسا جاقىندارىنا «قوشتاسۋ سوزدەرىن» جازا باستاعان. الايدا ونىڭ دەنەسى تاۋىپ، قاراعان ازاماتتار ەشقانداي ءجىپ نە موينىندا وزگە ىزدەردىڭ بولماعانىن ايتادى.
«جۇرەكتەن كەتتى مە، كىم ءبىلسىن...»
مارقۇمنىڭ تۋعان اعاسى قارجاۋبايدىڭ دوستارىنان پىكىر الىپ، ءۇي ىشىندەگى احۋال تۋرالى سۇرادىق.
«جەدەل جاردەمنەن ءولى دەنەنى مەن ءتۇسىردىم. يمامدى شاقىرىپ، دەنەنى تەكسەرتتىك. دەنەدە ەشقانداي ءىز بولعان جوق. يمام مارقۇم سۋيتسيد جاساسا جانازاسىن شىعارۋدان باس تارتۋى دا مۇمكىن. سول سەبەپتى ءبىز تەكسەرىپ الىڭىز دەدىك. دەنەنى تەكسەرۋگە جىبەرگەندە كەسكەن، كەيىن جىپپەن تىككەن. سونىڭ عانا ءىزى بار. بۇل – حالىقتىڭ ويىن بۇزۋ عوي. ول مۇمكىن، ءىنىسىنىڭ ولىمىنە ءوزىن كىنالاپ، 2 ايدان بەرى ءجۇردى. مۇمكىن سولاي جۇرەكتەن كەتتى مە، كىم ءبىلسىن...» - دەيدى قارجاۋبايدىڭ دوستارىنىڭ ءبىرى.
جەلتوقساننىڭ 9-ىندا نۇرعانناتتىڭ ءولىمى جايىندا پوليتسيا مالىمەتىنەن بەلگىلى بولدى.
"تالعار قالاسى ماڭىنان 30 جاستاعى ەر ادامنىڭ ءمايىتى تابىلدى. الدىن الا مالىمەتتەرگە سايكەس، ول اسىلىپ، وزىنە قول جۇمساعان. مارقۇم بيىل 4 قازاندا قازا بولعان شەرزات پولاتتىڭ اعاسى ەكەنى انىقتالدى", – دەپ حابارلاعان پوليتسيا. پوليتسيا بۇعان قوسا، تەرگەۋگە قاتىستى قۇجات – مارقۇمنىڭ تەلەفونداعى «سوڭعى جازبالارى» بولۋى مۇمكىن حابارلامالاردى دا جەدەل تاراتىپ ۇلگەردى.
ەرتەڭ، 10 جەلتوقسان كۇنى نۇرعانات عايىپباەۆتىڭ جانازاسى تالعار ماڭىنداعى ۇيىنەن تۇسكى 14:00-دە شىعارىلماق.
سىمبات ناۋحان
«ادىرنا» ۇلتتىق پورتالى
