Almaty oblysy Talǧar audanynda bır top adam qatysqan janjaldan mert bolǧan Şerzat Polattyŋ aǧasy Nūrǧanat Ǧaiypbaev ta ölı tabyldy. Kämeletke tolmaǧan balasynan aiyrylǧan äulette 2 ai 6 künnen soŋ taǧy bır ölım oryn aldy. Adyrna tılşılerı Talǧar maŋyndaǧy oqiǧa bolǧan auylǧa baryp, män-jaidy bılıp qaitty.
Jeltoqsannyŋ 9-ynda Nūrǧanattyŋ ölımı turaly Almaty oblysynyŋ polisiia departamentı habarlap, oqiǧany «suisid» dep tırkegenderın aitqan.
«ÖTE AUYR SOQQY»
Auyl maŋyna kıre bergende bırneşe polisiia kölıkterı baiqaldy. Auylda jeŋıl kölıkter qarasy ädettegıden köp boldy. Poliseiler Qarjaubaidyŋ qara şaŋyraǧyna baram degen kölıktı ötkızbei tūrdy.
Üi-ışı sūhbat beruden bas tartty. Tek Şerzat Polattyŋ qazasy kezınde BAQ-qa sūhbat bergen Baqyt Reimova: «Eşkım interviu bermeidı. Bıraq būl ölım suisid emes», - dep pıkır bıldırdı. Baqyt – Şerzattyŋ äkesı Qarjaubaidyŋ qaryndasy. Al Nūrǧanat – Qarjaubaiǧa – ını, Şerzatqa nemere aǧa bolady.
Marqūmnyŋ körşılerı qazaly üige tüngı 12-de barǧandaryn, ızdeu jūmystaryna at salysqandaryn aitty. Alaida olar da köp aşylmady. Kei körşılerı jurnalisterge sūhbat beruden bas tartyp, kameraǧa tüsırmeudı sūrady.
Qaiǧyly oqiǧa bolǧan künı taŋerteŋ Azat auylynda qaraly äuletke järdemdesıp jürgen Aitbek Amangeldı men Şerzat Polattyŋ ölımı boiynşa ıs qozǧaǧan advokattar ǧana tılşılerge aza da bolsa sūhbat bergen.
- Qazır olardy mazalamau kerek. Būl olardyŋ moraldyq jaǧdaiy üşın öte auyr soqqy boldy. Qatarynan ekı ülken, auyr qaiǧyǧa tap bolu oŋai emes. Bız bügın taŋerteŋ Şerzattyŋ aǧasy Nūrǧanattyŋ qaitys bolǧanyn estıdık. Nūrǧanattyŋ da, Şarzattyŋ da otbasylary bastapqy 40 künde tergeumen öte tyǧyz ainalysty. Pyşaq jaraqatynan keiın Nūrǧanat tūraqty türde tekseruler men emdeulerge baryp jürdı, al psihologtarmen jūmys tek 40 künnen keiın bastaldy. Psihologiialyq jaǧdaiy taŋqalarlyq jaqsy boldy, onyŋ josparlary bar edı. Ol osy audanda et satudy qaita bastady, tabys tapty. Degenmen, jaqyn adamyn joǧaltqandyqtan, jüregınde auyr dert qaldy. Ol tek aǧasynyŋ ūly emes, sonymen bırge özınıŋ tuǧan ūly sekıldı eŋ jaqyn adamyn joǧaltty, – dedı Aitbek Amangeldı.
Marqūmnyŋ ölı denesı auyl maŋyndaǧy Şerzat jerlengen beiıt ainalasynan tabylǧan. BAQ-ta polisiia mälımetıne süienıp, Nūrǧanat Ǧaiypbaev öz-özıne qol salǧan degen habar tarady. Ol tüngı 23:30-da üiınen şyǧyp, tüngı 12-den asa jaqyndaryna «qoştasu sözderın» jaza bastaǧan. Alaida onyŋ denesı tauyp, qaraǧan azamattar eşqandai jıp ne moinynda özge ızderdıŋ bolmaǧanyn aitady.
«JÜREKTEN KETTI ME, KIM BILSIN...»
Marqūmnyŋ tuǧan aǧasy Qarjaubaidyŋ dostarynan pıkır alyp, üi ışındegı ahual turaly sūradyq.
«Jedel järdemnen ölı denenı men tüsırdım. İmamdy şaqyryp, denenı tekserttık. Denede eşqandai ız bolǧan joq. İmam marqūm suisid jasasa janazasyn şyǧarudan bas tartuy da mümkın. Sol sebeptı bız tekserıp alyŋyz dedık. Denenı tekseruge jıbergende kesken, keiın jıppen tıkken. Sonyŋ ǧana ızı bar. Būl – halyqtyŋ oiyn būzu ǧoi. Ol mümkın, ınısınıŋ ölımıne özın kınälap, 2 aidan berı jürdı. Mümkın solai jürekten kettı me, kım bılsın...» - deidı Qarjaubaidyŋ dostarynyŋ bırı.
Jeltoqsannyŋ 9-ynda Nūrǧannattyŋ ölımı jaiynda polisiia mälımetınen belgılı boldy.
"Talǧar qalasy maŋynan 30 jastaǧy er adamnyŋ mäiıtı tabyldy. Aldyn ala mälımetterge säikes, ol asylyp, özıne qol jūmsaǧan. Marqūm biyl 4 qazanda qaza bolǧan Şerzat Polattyŋ aǧasy ekenı anyqtaldy", – dep habarlaǧan polisiia. Polisiia būǧan qosa, tergeuge qatysty qūjat – marqūmnyŋ telefondaǧy «soŋǧy jazbalary» boluy mümkın habarlamalardy da jedel taratyp ülgerdı.
Erteŋ, 10 jeltoqsan künı Nūrǧanat Ǧaiypbaevtyŋ janazasy Talǧar maŋyndaǧy üiınen tüskı 14:00-de şyǧarylmaq.
Symbat Nauhan
«Adyrna» ūlttyq portaly
