سيريانىڭ ەڭ قارت ساياسي تۇتقىنى 43 جىل بولعان تۇرمەدەن بوستاندىققا شىقتى، دەپ حابارلايدى "ادىرنا" ۇلتتىق پورتالى TRT-عا سىلتەمە جاساپ.
راگيد احماد ال-تاتاري - الەمدەگى ەڭ قارت ساياسي تۇتقىنداردىڭ ءبىرى. ول سيريا رەجيمىنىڭ تۇرمەلەرىندە 43 جىل قاماۋدا بولعان. ونىڭ تاريحى توزىمدىلىكتىڭ سيمۆولىنا اينالدى.
ال-تاتاري 1981 جىلى 27 جاسىندا تۇتقىندالعان. ونى تۇتقىنداۋعا يوردانياعا قاشقان ۇشقىش-قىزمەتتەسىنىڭ قاشقانى تۋرالى اقپاراتتى جاسىرعانى سەبەپ بولعان. ەكى جىل بويى جەكە كامەرادا وتىرعاننان كەيىن ونى مەززە تۇرمەسىنەن تادمورعا (پالميرا) جانە كەيىنىرەك سەدنا تۇرمەسىنە اۋىستىرعان. 2011 جىلدان بەرى ول ادرا ورتالىق تۇرمەسىندە بولعان. وعان اسكەري سوت ءبىر مينۋتتا ءومىر بويى باس بوستاندىعىنان ايىرۋعا ۇكىم شىعارعان.
تۇرمەدە ال-تاتاري سۋرەتشى جانە ءمۇسىنشى رەتىندە تالانتىن كورسەتكەن. ول نان ۇگىندىلەرىنەن، قانتتان جانە ءزايتۇن سۇيەكتەرىنەن مينياتيۋرالار جاساعان. سونداي-اق نان قامىرىنان فيگۋرالار جاساپ، ماتاعا شاحمات تاقتاسىن سالىپ شاحمات تۋرنيرلەرىن ۇيىمداستىرعان.
ونىڭ ۇلى ۆايل، قازىر 40 جاستا. بالالىق شاعىندا اناسى وعان اكەسىنىڭ جاي عانا كەتكەنىن ايتقان ەكەن.
ء"اربىر بەيتانىس ادامدى كورگەندە، مەن: «مۇمكىن، بۇل مەنىڭ اكەم بولار؟» دەپ ويلايتىنمىن. مەن ەسىككە جاقىنداپ كۇتىپ تۇراتىنمىن. بىراق ەشكىم كەلمەدى. ۋاقىت وتە كەلە بۇل شىداۋعا بولمايتىن نارسەگە اينالدى" — دەدى ول.
بۇرىنعى تۇتقىنداردىڭ ءبىرى ولاردىڭ العاشقى اڭگىمەسىن ەسكە الىپ: «مەن وعان قانشا جىلعا سوتتالعانىن سۇراعاندا، ول كۇلىپ: «سەنىڭ مەرزىمىڭ — مەن تۇرمەنىڭ دارەتحاناسىندا وتكىزگەن جىلدارىمنىڭ سانى»، — دەپ جاۋاپ بەرگەن»، — دەپ اتاپ ءوتتى.
راگيد ال-ءتاتاريدىڭ تاريحى تاڭعاجايىپ توزىمدىلىكتىڭ سيمۆولى بولىپ قالدى.
بۇعان دەيىن يسلامشىل كوتەرىلىسشىلەردىڭ كۇشتەرى سيريا استاناسى ديماشىققا كىرگەنىن جانە اسكەري تۇرمەلەردەن مىڭداعان تۇتقىننىڭ بوساتىلعانىن جازعان ەدىك.
