2024 جىلعى 1 قاراشاداعى جاعداي بويىنشا قازاقستان حالقىنىڭ سانى 210 139 ادامعا ءوسىپ، 20 243 981 ادامدى قۇرادى، دەپ حابارلايدى "ادىرنا" ۇلتتىق پورتالى. بۇل تۋرالى ۇلتتىق ستاتيستيكا بيۋروسى مالىمدەدى.
ۇلتتىق ستاتيستيكا بيۋروسىنىڭ اقپاراتىنا سۇيەنسەك، رەسپۋبليكا حالقىنىڭ 12 727 404-ءى قالا تۇرعىندارى، ال 7 516 577-ءى اۋىلدىق جەرلەردە تۇرادى.
بيۋرونىڭ ايتۋىنشا، قازاقستاندا 10 353 239 ايەل جانە 9 890 742 ەر ادام ءومىر سۇرەدى.
10 ايدا ەلدە 309 310 بالا دۇنيەگە كەلىپ، 110 867 ادام قايتىس بولعان. تابيعي ءوسىم 198 443 ادامدى قۇرادى.
كوشى-قون بالانسى دا وڭ كورسەتكىش كورسەتكەن. 10 ايدا قازاقستانعا 22 955 ادام كەلسە، 11 259 ادام كەتكەن. كوشى-قون سالدوسى — 11 696 ادام.
«2023 جىلدىڭ وسى كەزەڭىمەن سالىستىرعاندا، قازاقستانعا كەلگەندەردىڭ سانى 1618 ادامعا كوبەيىپ، كەتكەندەردىڭ سانى 2548 ادامعا ازايدى»، - دەلىنگەن ۇلتتىق ستاتيستيكا بيۋروسىنىڭ مالىمدەمەسىندە.
ەلدەگى ەڭ حالقى كوپ قالا - الماتى قالاسى. مۇندا 2 280 296 ادام تۇرادى.
بۇعان دەيىن، قازاقستان حالقىنىڭ ءبىر جىل ىشىندەگى ءوسىمى 223 مىڭ 218 ادامعا ارتقانى تۋرالى جازعان ەدىك.
