نۇرلان بيمۋرزين ەكس-پرەزيدەنت نۇرسۇلتان نازارباەۆتىڭ قىزى ءاليا نازارباەۆا مەن كونستيتۋتسيالىق كەڭەستىڭ بۇرىنعى توراعاسى يگور روگوۆتىڭ جۇبايى ۆالەنتينا روگوۆاعا قارسى ادىلدىك ىزدەۋدە، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
كاسىپكەر نۇرلان بيمۋرزين رەيدەرلىك شابۋىل بويىنشا ادىلدىككە قول جەتكىزۋ ءۇشىن اقش، ۇلىبريتانيا جانە شۆەيتساريا سياقتى ءۇش حالىقارالىق يۋريسديكتسيادا ارىزداناتىنىن مالىمدەدى.
"بيىلعى اقپان ايىنان باستاپ ءبىزدىڭ بيزنەسىمىزگە، مۇلكىمىزگە، اكتيۆتەرىمىزگە، جانارماي قۇيۋ ستانتسيالارىنا جانە مۇناي بازالارىنا جاسالعان رەيدەرلىك شابۋىل بويىنشا باس پروكۋراتۋراعا كوپتەگەن ارىز جازدىق. ماتەريالدارىمىز ءىىم مەن ەكونوميكالىق تەرگەۋ دەپارتامەنتىندە قارالعانىمەن، ولاردان تەك جاۋاپسىز حاتتار الدىق. ءبىزدىڭ ىستەرىمىز قابىلدانباي، ءىس جۇرگىزۋ مەرزىمى ءوتىپ كەتتى دەگەن سىلتاۋمەن جابىلىپ وتىردى. كونستيتۋتسيادا ءاربىر ازاماتتىڭ قورعانىسقا قۇقىعى بار دەپ جازىلعانىمەن، ءوز ەلىمىزدە ءبىز بۇل قورعاۋعا قول جەتكىزە المادىق. سوندىقتان حالىقارالىق ينستانتسيالارعا جۇگىنۋگە تولىق مورالدىق قۇقىعىمىز بار. ءبىز اقش، ۇلىبريتانيا، ۇلتتىق قىلمىس اگەنتتىگى (NCA) جانە شۆەيتساريانىڭ باس پروكۋراتۋراسىنا ارىز جازدىق،" – دەدى بيمۇرزين.
بيزنەسمەننىڭ ايتۋىنشا، حالىقارالىق ينستانتسيالارعا شاعىمدانۋ ءۇشىن قاجەتتى قۇجاتتار تولىق دايىن.
ء"بىز بارلىق كەلىسىم-شارتتار مەن دالەلدەردى جينادىق. قۇجاتتارىمىز زاڭدىق تۇرعىدان بىردەي كۇشكە يە. قازىر ءبىزدىڭ ارىزدارىمىز ءتيىستى مەكەمەلەرگە جەتتى. تەرگەۋ باستالعان جاعدايدا قۇجاتتاردىڭ تولىق پاكەتىن تاپسىرۋعا دايىنبىز. ەگەر كۇتپەگەن جاعدايلار بولىپ، وتباسىمىزعا قاۋىپ تونسە، قۇجاتتاردى تەرگەۋ ورگاندارىنا جەتكىزەتىن سەنىمدى ادامىمىز بار،" – دەپ اتاپ ءوتتى ول.
نۇرلان بيمۋرزين اكتيۆتەرىنىڭ قىتايدىڭ SinoOil كومپانياسىنا زاڭسىز ساتىلعانىن مالىمدەدى.
ء"بىزدىڭ سەگىز مۇناي بازامىز بەن 90-نان استام جانارماي قۇيۋ ستانتسيامىز جالپى قۇنى 7,126 ميلليارد تەڭگەگە ساتىلدى. الايدا كومپانيامىزدىڭ نارىقتىق قۇنى سول كەزدە 160-170 ميلليون دوللار بولعان. اكتيۆتەرىمىز ءۇش ەسە تومەن باعاعا ساتىلدى،" – دەدى كاسىپكەر.
ءبيمۋرزيننىڭ ايتۋىنشا، بۇل ىسكە ۆالەنتينا روگوۆانىڭ بەلسەندى قاتىسى دا بار.
"روگوۆا SinoOil كومپانياسىنا ءبىزدىڭ اكتيۆتەرىمىزدى تىركەۋگە ارنالعان قۇجاتتارعا تىكەلەي قول قويعان. بۇل رەيدەرلىك شابۋىلدىڭ نەگىزگى دالەلى،" – دەدى ول.
ايتا كەتەيىك، 28 اقپان كۇنى بيمۋرزين نازارباەۆا مەن روگوۆا تاراپىنان رەيدەرلىك شابۋىل جاسالعانىن مالىمدەدى. 14 ناۋرىزدا باس پروكۋراتۋرا رەيدەرلىك ءىس بويىنشا ارىزدى تىركەگەن. ال 10 ماۋسىملا نازارباەۆا سوتتا قازاقستاندىق كاسىپكەرلەرگە جەڭىلگەن ەدى.
بيمۋرزين ادىلدىك ءۇشىن كۇرەستى جالعاستىراتىنىن، ال نازارباەۆا مەن روگوۆانىڭ ءىس-ارەكەتتەرى ءۇشىن جاۋاپ بەرۋى ءتيىس ەكەنىن ايتتى.
