وسى جىلدىڭ 6 جەلتوقسان كۇنى الماتى ورتالىق مەشىتىندە العاش رەت جۇما نامازىنا كەلۋشىلەر مەشىت اۋلاسىنا سىيماي قالدى. پارىز نامازى باستالعانعا دەيىن مەشىت قىزمەتكەرلەرى جاماعاتتى مەشىت اۋلاسىنا ورنالاستىرعان. الايدا، پارىز نامازى باستالعان سوڭ مەشىتتىڭ وڭ جاق بولىگى ياعني، م.مامەتوۆا كوشەسىنىڭ ءبىر بولىگىندە 5 مينۋتتىق قۇلشىلىق پارىزىن وتەۋ ورىن العان. سالدارىنان كوشە كەپتەلىسى پايدا بولدى، دەپ حابارلايدى "ادىرن" ۇلتتىق پورتالى.
وقيعاعا قاتىستى الماتى ورتالىق مەشىتىنىڭ ءباسپاسوز قىزمەتى مالىمدەمە جاسادى.
"قۇرمەتتى جۇما نامازىنا كەلۋشى جاماعات! پايعامبارىمىز (س.ع.س.) جەتى جەردە ناماز وقۋعا تيىم سالعان. ولار: قوقىس جينالعان جەردە، مال سوياتىن ورىندا، قابىر باسىندا، جولدىڭ ۇستىندە، مونشادا، مال سۋارىلاتىن ورىندا جانە قاعبانىڭ ۇستىندە.
جول ۇستىندە ناماز وقۋدان تيىم سالۋىنىڭ باستى سەبەبى، جول قوزعالىسىنا كەدەرگى كەلتىرمەۋ بولىپ تابىلادى. ول كوشەمەن جەدەل جاردەم كولىگى، ءورت ءسوندىرۋ كولىگى نەمەسە جۇمىسىنا اسىققان ادام جۇرەتىنى بەلگىلى. سوندىقتان 5 مينۋتقا كوشەنى جاۋىپ ناماز وقۋ قانشاما ۇزىن-سونار كوشە كوپتەلىسىن تۋىنداتادى.
جۇما نامازىن وقۋ كەزىندە جولدى جاۋىپ، باسقا ادامدارعا زيان تيگىزۋگە بولمايدى. سول سەبەپتى، بارشاڭىزدى نامازعا ەرتەرەك كەلىپ، ءتيىستى كورسەتىلگەن ورىندارعا جايعاسۋدى، جولداردى جاپپاۋدى، كولىكتەردى دە دۇرىس ورىنعا قويۋدى، تالاپ پەن ءتارتىپتى قاتاڭ ساقتاۋلارىڭىزدى سۇرايمىز", - دەپ جازىلعان ءباسپاسوزدىڭ تاراعان حابارلاماسىندا.
