الماتىنىڭ تۇركسىب اۋدانىندا بۇكتەلگەن كۇيدە سومكەدەن تابىلعان ايەلدىڭ مايىتىنە قاتىستى پوليتسيا قىلمىستىق ءىس قوزعادى. بۇل وقيعا قوعامدا ۇلكەن دۇربەلەڭ تۋعىزعان، دەپ حابارلايدى "ادىرنا" ۇلتتىق پورتالى.
ءمايىتتى بەلبەۋمەن بۋىپ، سكوتچپەن وراپ، سومكەگە سالىپ كەتكەن. الدىن الا مالىمەت بويىنشا، سومكە اۋداننىڭ ەڭ كريمينوگەندى ۋچاسكەلەرىنىڭ بىرىنە اپتا بويى تۇرعان. ءمايىتتى تازالىق قىزمەتكەرى كەزدەيسوق تاۋىپ العان.
پوليتسيانىڭ مالىمەتىنشە، بۇل جاعداي قر قىلمىستىق كودەكسىنىڭ "كىسى ءولتىرۋ" بابىمەن تەرگەلۋدە.
"تۇركسىب اۋداندىق پوليتسيا باسقارماسى قىلمىستىق ءىس قوزعادى. قازىرگى ۋاقىتتا وبەكتيۆتى ءمان-جايدى انىقتاۋعا باعىتتالعان جەدەل-تەرگەۋ شارالارى جۇرگىزىلۋدە. تەرگەۋ مۇددەسىنە سايكەس، وزگە اقپارات جاريالانبايدى،" – دەدى الماتى پد رەسمي وكىلى سالتانات ازىربەك.
وقيعا بولعان جەردىڭ تۇرعىندارى مارقۇمنىڭ گاۋھار ەسىمدى ايەل ەكەنىن، سوڭعى ۋاقىتتا ونىڭ ءبىر ەر اداممەن ءجيى جانجالداسىپ جۇرگەنىن ايتقان.
"سومكە اۋلادا اپتا بويى تۇردى. ىشىندە ادامنىڭ دەنەسى بار ەكەنىن كىم بىلگەن؟" – دەيدى تۇرعىندار.
ءمايىتتىڭ تابىلعانى تۋرالى اقپارات 5 جەلتوقسان كۇنى تارالعان بولاتىن.
بۇل جاعداي تۇرعىندار اراسىندا قورقىنىش پەن الاڭداۋشىلىق تۋدىردى. قالانىڭ قاۋىپسىزدىگىنە بايلانىستى سۇراقتار قايتا كوتەرىلدى.
پوليتسيا كۇدىكتىنى انىقتاۋ جانە ۇستاۋ ءۇشىن بارلىق قاجەتتى شارالاردى قابىلداپ جاتقانىن مالىمدەدى. تەرگەۋ جالعاسۋدا.
