«Porus» جشس قۇرىلتايشىسى قۋات ەرمەنتاەۆ ەكس-پرەزيدەنت نۇرسۇلتان نازارباەۆتىڭ نەمەرە ءىنىسى، بولات نازارباەۆتىڭ ۇلى نۇربول نازارباەۆ پەن ونىڭ “جاقىندارى” رەيدەرلىك جاسادى دەپ ايىپتاۋدا، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
اقپاراتقا سايكەس، 2019 جىلى جەلتوقسانىندا وزدەرىن نۇربول نازارباەۆتىڭ ناعاشىسىمىز دەپ تانىستىرعان س. ا. زورباەۆ پەن «سىرىم» ەسىمدى ەكى ازامات قۋات ەرمەنباەۆپەن ونىڭ تۋىستارىن قورقىتىپ، ونىڭ «Porus» كومپانياسىنداعى ۇلەسىن زورباەۆتىڭ اتىنا اۋدارتىپ، قۇقىق قورعاۋ ورگاندارىنا جۇگىنبەۋ تۋرالى ەسكەرتۋ جاسايدى.
«مەن ءوز ءومىرىم مەن جاقىن تۋىستارىمنىڭ ءومىرى ءۇشىن قورقىپ، سەرىكتەستىكتەگى ۇلەستىڭ 16%-ىن زورباەۆتىڭ اتىنا جازۋعا ءماجبۇر بولدىم. ول نۇربول نازارباەۆتىڭ قامقورلىعىمەن ءوز ءىسىن جۇزەگە اسىرادى»، – دەلىنگەن باسىلىم كەلتىرگەن ەرمەنتاەۆتىڭ مالىمدەمەسىندە.
ەرمەنتاەۆتىڭ سوزىنشە، ول اعاسى رات ەرمەنتاەۆپەن بىرگە 2011 جىلى «Porus» جشس-نى قۇرادى. اعايىندىلار ۇلەستەسىپ قۇرعان سەرىكتەستىك گەولوگيالىق بارلاۋ قىزمەتتەرىن كورسەتىپ، ءۇش بۇرعىلاۋ اگرەگاتى مەن ءتيىستى ليتسەنزيالارىن الادى. بيزنەستى كەڭەيتۋ ماقساتىندا سارسەمباەۆا گۇلميرا تولەبايقىزى مەن شاكىرباەۆ سەرىك امانجانۇلى ەسىمدى ازاماتتاردان ينۆەستيتسيا قابىلدايدى. تيىسىنشە، سارسەمباەۆ – 33%، شاكىرباەۆ س. ا. – 34%; ەرمەنتاەۆ قۋات – 33% كومپانيا ۇلەسىن الادى. ۇلەسكەرلەر مىندەتتەردى ءبولىپ، سارسەمباەۆا ينۆەستيتسيا تارتىپ، شاكىرباەۆ جۇمىسپەن قامتىپ، ەرمەنتاەۆ بارلاۋ جۇمىستارىن جۇرگىزەدى. ونىڭ سوزىنشە، شاكىرباەۆ نۇربول نازارباەۆتىڭ مۇددەسىن قورعايتىن ادام بولعان.
«وسىعان بايلانىستى شاكىرباەۆ سەرىكتەستىكتىڭ قىزمەتىنە بەلسەندى ارالاسىپ، سەرىكتەستىكتىڭ بارلىق وپەراتسيالىق قىزمەتىنە تىكەلەي جەتەكشىلىك ەتكەنىن اتاپ وتكەن ءجون»، – دەلىنگەن جازبادا.
باسىلىمنىڭ جازۋىنشا، 2016 جىلعا دەيىن سەرىكتەستىك ديۆيدەند تولەپ كەلەدى. سول جىلدىڭ سوڭىندا شاكىرباەۆ باسقارۋ قىزمەتىن ەرمەنتاەۆتان الىپ، ءوزىنىڭ سەنىمدى وكىلى الەكسەي وشەروۆكە تابىستايدى. دەگەنمەن وعان جانە سارسەمباەۆاعا ديۆيدەندتى ۋاقىتىندا تولەيتىنىن ايتىپ سەندىرەدى. وسى كەزدەن باستاپ ەرمەنتاەۆ سەرىكتەستىك جۇمىسىنان تولىق شەتتەتىلەدى.
«الايدا شاكىرباەۆ مىندەتتەمەلەرىن ورىنداماي، 2017 جىلدان باستاپ مەن ولاردان ديۆيدەندتەردى تولىق كولەمدە المادىم. وسىعان بايلانىستى شاكىرباەۆپەن جانە وشەروۆپەن بىرنەشە رەت جانجالداستىم. قىزمەتىمدى قايتارىپ الۋ تۋرالى تالاپتارىمدى قوقان-لوقىمەن قارسى الدى. اقىرى ءوز ۇلەسىمنەن باس تارتىپ، نۇربول نازارباەۆتىڭ تۋىسى اتالعان زورباەۆقا جازىپ بەردىم»، – دەپ اتاپ وتكەن ەرمەنتاەۆ.
ول قىزمەتىنەن كەتكەن 2017-2022 جىلدار ارالىعىندا «Porus» كومپانياسىنىڭ جالپى تابىسى 7 ملرد تەڭگەنى قۇراعان، جىلدىق تابىسى 300 ملن تەڭگە دەپ ەسەپتەلگەن.
2020 جىلى شاكىرباەۆ پەن وشەروۆ سەرىكتەستىكتىڭ سالىق ماسەلەلەرىنە بايلانىستى ەرمەنتاەۆتىڭ رۇقساتىنسىز كومپانيانى بانكروتقا ۇشىراتا باستاعان. بۇعان قوسا، بانكروتتىق كەزىندە قىمبات جابدىقتاردى سالىق تولەمىنە جىبەرمەس ءۇشىن جاڭادان قۇرىلعان تاعى ءبىر كومپانياعا ساتقان. ەرمەنتاەۆتى وسى كومپانيانىڭ ۇلەسكەرى ەتۋگە ۋادە بەرگەن.
«نۇربول نازارباەۆتىڭ مۇددەسىنە ارەكەت ەتكەن شاكىرباەۆ پەن وشەروۆ سەرىكتەستىكتىڭ بانكروتتاۋ ءۇشىن شىعىندار مەن وزگە دە ءىس-قيمىلداردى جاساندى تۇردە اسىرا سىلتەۋ جولىمەن مەملەكەتكە سالىق تولەۋدەن جالتارعان بولۋى مۇمكىن. سونداي-اق سەرىكتەستەرگە 1 ملرد تەڭگە كولەمىندە ديۆيدەنت تولەمەي، زالال كەلتىرگەن»، – دەدى ەرمەنتاەۆ.
اقپارات بويىنشا، ول 2022 جىلى 4 ساۋىردە اتالعان فاكتىلەر بويىنشا الماتى قالاسىنىڭ پروكۋراتۋراسىنا ارىز بەرگەن، الايدا 2022 جىلعى 2 قاراشادا قىلمىستىق ءىس توقتاتىلعانىن ايتادى. ءىس قىلمىستىق قۇقىق بۇزۋشىلىق قۇرامىنا بولماۋىنا بايلانىستى توقتاتىلعان. دەگەنمەن 2023 جىلدىڭ 7 قاراشاسىندا ءىس قايتا قارالىپ باستاعان.
