دەپۋتات جاۋاپقا تارتۋدى سۇراعاندا نازارباەۆ بانكروتقا ۇشىراپتى

قازاقستاننىڭ تۇڭعىش پرەزيدەنتىنىڭ نەمەرە ءىنىسى، مارقۇم بولات نازارباەۆتىڭ ۇلى نۇربول نازارباەۆقا قاتىستى بانكروتتىق ءىسى قوزعالدى، دەپ حابارلايدى "ادىرنا" ۇلتتىق پورتالى Shishkin Like-قا سىلتەپ.

اقپاراتقا سايكەس، سوت نۇربول نازارباەۆتىڭ ەسەپشوتتارى مەن مۇلكىن تۇتقىنداپ، كومپانيالارداعى ۇلەستەرىنە شەكتەۋ قويعان. سونداي-اق وعان ەلدەن شىعۋعا تىيىم سالىندى. سەبەبى ونىڭ قارىزى 58 ملرد تەڭگە دەپ كورسەتىلگەن.

ەندى ول بەس جىل بويى نەسيە الا المايدى، جەكە كاسىپكەر رەتىندە تىركەلۋ قۇقىعىنان ايىرىلادى جانە ءىرى مامىلەلەر مەن تابىستارى تۋرالى حابارلاپ وتىرۋعا مىندەتتى. قارىزىن وتەۋ ءۇشىن ونىڭ مۇلكى ساتىلۋى مۇمكىن، تەك جالعىز تۇرعىن ءۇيى مەن كۇندەلىكتى قاجەتتى زاتتارى وزىندە قالادى.

بۇعان دەيىن ءماجىلىس دەپۋتاتى رينات زايىت نۇربول نازارباەۆتىڭ اكتيۆتەرى 57 ملرد تەڭگە كولەمىندە مەملەكەت مەنشىگىنە قايتارىلعانىن مالىمدەگەن. ول باس پروكۋرور بەرىك اسىلوۆتان نازارباەۆقا تيەسىلى بارلىق كومپانيالار مەن مۇلىكتى تۇگەندەۋدى سۇراعان بولاتىن.

نۇربول نازارباەۆ بۇعان دەيىن دە بىرنەشە رەت رەيدەرلىك ارەكەتتەرگە قاتىسى بار دەپ ايىپتالعان. كاسىپكەر قۋات ەرمەنتاەۆ 2019 جىلى ونىڭ تۋىستارى ءوز ۇلەسىن Porus كومپانياسىندا كۇشپەن تارتىپ العانىن مالىمدەگەن.

ال 2025 جىلدىڭ سوڭىندا دەپۋتات ەرمۇرات باپي بۇرىنعى كامەنسك اسىل تۇقىمدى زاۋىتىنىڭ جۇمىسشىلارىنان 9 مىڭ گەكتار جەردىڭ تارتىپ الىنعانىن ايتقان.

دەپۋتاتتار سونىمەن بىرگە «التىن وردا» بازارىنا قاتىستى تەرگەۋ جۇرگىزۋدى تالاپ ەتىپ وتىر. 2021 جىلى نۇربول نازارباەۆ سول بازارعا يەلىك ەتكەن كومپانيانىڭ قۇرىلتايشىلارىنىڭ ءبىرى بولعان.

باق مالىمەتىنشە، نۇربول نازارباەۆقا تيەسىلى كومپانيالار قاتارىندا Prime cap – باس كومپانياسى، Prime Capital Real – الماتى وبلىسىندا 22 نىسان مەن 3 جەر ۋچاسكەسى بار، Prime Capital Re Plaza – الماتىداعى ەكى جەر ۋچاسكەسى، Prime Capital Re Ushkonyr – شامالعانداعى جەرلەر، Prime Capital Re Alakol, Prime Capital Re Talgar – تالعار اۋدانىنداعى جەر جانە شاراپ ءوندىرۋ زاۋىتى، Prime Capital Re Karasay – ۇشقوڭىر مەن باسقا دا اۋىلشارۋاشىلىق جەرلەرى، باحار-ا – قاراساي اۋدانىنداعى ءۇش قاباتتى تويحاناسى، Prime Capital Invest – قارجىلىق قىزمەتتەر، Qaz-Ak-Kus – ىلە اۋدانىنداعى قۇس فابريكاسى، PLS-TM جانە PLS ينۆەستيتسيوننو-سترويتەلنايا كومپانيا – ازتم زاۋىتىنىڭ ءبىر بولىگى بار.