قازاقستاندىق شەنەۋنىكتەردىڭ، بيزنەسمەندەر مەن دەپۋتاتتاردىڭ مالىمەتتەرى «سيرەنا-ترەۆەل» رەسەيلىك جۇيەسىن بۇزعاننان كەيىن جەلىگە تارالىپ كەتتى، دەپ حابارلايدى "ادىرنا" ۇلتتىق پورتالى قازتاگ اگەنتتىگىنە سىلتەپ.
«ءبىزدىڭ تەك دەپۋتاتتاردىڭ عانا ەمەس، مەملەكەتتىك قىزمەتكەرلەردىڭ، بيزنەسمەندەردىڭ جانە جەكە تۇلعالاردىڭ قوزعالىسىنا قاتىستى مالىمەتتەر جاريالانعان. مالىمەتتەر وتە كوپ مولشەردە تارالعان. ميلليوندارعا دەيىن جەتۋى مۇمكىن، مەنىڭ ەستىگەنىم سولاي»، – دەپ مالىمدەدى ءماجىلىس دەپۋتاتى ايدوس سارىم.
2023 جىلدىڭ ساۋىرىندە ۋكراينالىق Muppets حاكەرلەر توبى «سيرەنا-ترەۆەل» رەسەيلىك كومپانياسىنىڭ دەرەكتەر بازاسىن بۇزعانى بەلگىلى بولدى. بۇل بازا جولاۋشىلاردىڭ جانە ولاردىڭ ساقتاندىرۋى تۋرالى مالىمەتتەردى قامتىعان. ال كۇزدە Leonardo برونداۋ جۇيەسىندە اقاۋلار تىركەلدى.
2007-2023 جىلدار ارالىعىنداعى مالىمەتتەر ينتەرنەتكە تاراپ كەتتى. بۇگىندە سول مالىمەتتەر اراسىندا Air Astana, Scat, Qazaq Air جانە Bek Air سەكىلدى قازاقستاندىق اۋە كومپانيالارىنىڭ ەل ىشىندەگى رەيستەر تاريحى دا بار ەكەنى انىقتالدى. سونداي-اق، قازاقستاندىقتاردىڭ رەسەيلىك اۋە كومپانيالارىمەن حالىقارالىق رەيستەرى تۋرالى دەرەكتەر دە بازاعا ەنگەن.
ايدوس سارىم بۇل جاعدايعا نارازىلىق ءبىلدىرىپ، ونىڭ قازاقستان ازاماتتارىنىڭ كونستيتۋتسيالىق قۇقىقتارىن بۇزاتىنىن ايتتى.
«بۇل ماسەلەمەن قازاقستان رەسپۋبليكاسىنىڭ باس پروكۋراتۋراسى اينالىسۋى ءتيىس دەپ سانايمىن. مۇنداي جاعدايلاردىڭ قايتالانباۋى ءۇشىن ءتيىستى شارالار قابىلداۋ قاجەت. بۇل وتە ورەسكەل جاعداي. ءبىزدىڭ قاراپايىم ازاماتتار، بيزنەسمەندەر جانە دەپۋتاتتار جەكە ومىرگە قول سۇعىلماۋشىلىق قۇقىعىنا يە. ءبىزدىڭ قۇقىق قورعاۋ ورگاندارىندا بۇل ماسەلەنى شەشۋ ءۇشىن بارلىق زاڭدى قۇرالدار بار. ەندى ولاردىڭ قانشالىقتى ءتيىمدى قولدانىلاتىنى ماڭىزدى. ءبىز نورماتيۆتىك اكتىلەردى قابىلداعان كەزدە، ولار جۇمىس ىستەيدى جانە ءتيىستى شەشىمدەر قابىلداي الادى دەپ سەندىرگەن ەدى»، – دەدى دەپۋتات.
سونداي-اق، ايدوس سارىم مالىمەتتەر تارالۋىنا ءوزىنىڭ دە ىلىنگەنىن اتاپ ءوتتى. بىرقاتار ءماجىلىس دەپۋتاتتارى بۇل ماسەلەگە قاتىستى باس پروكۋرورعا جۇگىنۋدى جوسپارلاپ وتىر.
