Qazaqstandyq sheneýnikterdiń, bıznesmender men depýtattardyń málimetteri «Sırena-Trevel» reseılik júıesin buzǵannan keıin jelige taralyp ketti, dep habarlaıdy "Adyrna" ulttyq portaly QazTAG agenttigine siltep.
«Bizdiń tek depýtattardyń ǵana emes, memlekettik qyzmetkerlerdiń, bıznesmenderdiń jáne jeke tulǵalardyń qozǵalysyna qatysty málimetter jarııalanǵan. Málimetter óte kóp mólsherde taralǵan. Mıllıondarǵa deıin jetýi múmkin, meniń estigenim solaı», – dep málimdedi Májilis depýtaty Aıdos Sarym.
2023 jyldyń sáýirinde ýkraınalyq Muppets hakerler toby «Sırena-Trevel» reseılik kompanııasynyń derekter bazasyn buzǵany belgili boldy. Bul baza jolaýshylardyń jáne olardyń saqtandyrýy týraly málimetterdi qamtyǵan. Al kúzde Leonardo brondaý júıesinde aqaýlar tirkeldi.
2007-2023 jyldar aralyǵyndaǵy málimetter ınternetke tarap ketti. Búginde sol málimetter arasynda Air Astana, Scat, Qazaq Air jáne Bek Air sekildi qazaqstandyq áýe kompanııalarynyń el ishindegi reıster tarıhy da bar ekeni anyqtaldy. Sondaı-aq, qazaqstandyqtardyń reseılik áýe kompanııalarymen halyqaralyq reısteri týraly derekter de bazaǵa engen.
Aıdos Sarym bul jaǵdaıǵa narazylyq bildirip, onyń Qazaqstan azamattarynyń konstıtýııalyq quqyqtaryn buzatynyn aıtty.
«Bul máselemen Qazaqstan Respýblıkasynyń Bas prokýratýrasy aınalysýy tıis dep sanaımyn. Mundaı jaǵdaılardyń qaıtalanbaýy úshin tıisti sharalar qabyldaý qajet. Bul óte óreskel jaǵdaı. Bizdiń qarapaıym azamattar, bıznesmender jáne depýtattar jeke ómirge qol suǵylmaýshylyq quqyǵyna ıe. Bizdiń quqyq qorǵaý organdarynda bul máseleni sheshý úshin barlyq zańdy quraldar bar. Endi olardyń qanshalyqty tıimdi qoldanylatyny mańyzdy. Biz normatıvtik aktilerdi qabyldaǵan kezde, olar jumys isteıdi jáne tıisti sheshimder qabyldaı alady dep sendirgen edi», – dedi depýtat.
Sondaı-aq, Aıdos Sarym málimetter taralýyna óziniń de ilingenin atap ótti. Birqatar Májilis depýtattary bul máselege qatysty Bas prokýrorǵa júginýdi josparlap otyr.
