بيىل جەتىسۋ وبلىسىنىڭ ەسكەلدى اۋدانىندا 4 مەكتەپ پەن بالاباقشاعا جوندەۋ جۇرگىزىلدى، سونداي-اق دەنساۋلىق ساقتاۋ، مادەنيەت جانە سپورت سالالارىنداعى 12 جاڭا نىساندى ىسكە قوسۋ جوسپارلانۋدا. ونىڭ 5-ءى پايدالانۋعا بەرىلدى، قالعان 6-ىن جەلتوقسان ايىنىڭ سوڭىنا دەيىن ىسكە قوسۋ كوزدەلگەن. بۇل تۋرالى بۇگىن وبلىس اكىمى بەيبىت يساباەۆتىڭ ەسكەلدى اۋدانىنىڭ تۇرعىندارىمەن كەزدەسۋى بارىسىندا ايتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
م. مامەتوۆا اتىنداعى جانە قوڭىر اۋىلىنداعى ورتا مەكتەپتەر مەن م. بايسوۆ اۋىلىنداعى بالاباقشا كۇردەلى جوندەۋدەن ءوتتى، ال الدابەرگەنوۆ اۋىلىنداعى بالاباقشاعا اعىمداعى جوندەۋ جۇرگىزىلدى. قابليسا جىراۋ اتىنداعى جانە قاينارلى اۋىلىنداعى ورتا مەكتەپتەرگە اۆتوبۋس پەن «گازەل» اۆتوكولىگى ساتىپ الىندى. اۋدانداعى 11 مەكتەپتىڭ كىتاپحاناسى جاڭارتىلدى.
- حالىقتىڭ ءوتىنىشىن ەسكەرە كەلە، ەشكىولمەس جانە جاڭالىق اۋىلدارىندا 180 جانە 120 ورىندى ەكى جاڭا مەكتەپ قۇرىلىسىنىڭ جوبالىق-سمەتالىق قۇجاتتارى دايىندالىپ جاتىر. مەملەكەتتىك ساراپتاما قورىتىندىسى جىل سوڭىنا دەيىن شىعادى دەپ كۇتىلۋدە. ال قارابۇلاق اۋىلىنداعى ورتا مەكتەپ پەن ەلتاي اۋىلىنداعى س. سەيفۋللين اتىنداعى مەكتەپكە كۇردەلى جوندەۋ جۇمىسىنىڭ جوبالىق-سمەتالىق قۇجاتتاماسى دايىن، مەملەكەتتىك ساراپتامانىڭ قورىتىندىسى الىندى. بيۋدجەتتى ناقتىلاۋ كەزىندە بۇل ەكى جوباعا دا ءتيىستى قاراجات قاراستىرىلادى. سونىمەن قاتار اۋدانداعى ءبىلىم بەرۋ مەكەمەلەرىن گازداندىرۋ جۇمىستارى جۇرگىزىلۋدە. قارابۇلاق اۋىلىنداعى شەستاكوۆ اتىنداعى مەكتەپ بيۋدجەت قاراجاتى ەسەبىنەن، ال سىرىمبەت اۋىلىنداعى جاقىپباەۆ اتىنداعى مەكتەپ دەمەۋشى كومەگىمەن گازعا قوسىلدى، - دەپ اتاپ ءوتتى ب. يساباەۆ.
دەنساۋلىق ساقتاۋ ماسەلەسىنە كەلسەك، سالانىڭ ينفراقۇرىلىمىن جاقسارتۋ ماقساتىندا بيىل ەكپىندى جانە جاڭالىق اۋىلدارىندا 2 بلوكتى-ءمودۋلدى مەديتسينالىق پۋنكت ورناتىلدى، تاۋەلسىزدىك كۇنى قارساڭىندا اقەشكى اۋىلىندا دا ىسكە قوسىلادى. سول سياقتى «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا اۋداندا 5 نىسان سالىنادى. سونىڭ ىشىندە شىمىرداعى دارىگەرلىك امبۋلاتوريا مەن م.بايسوۆ اۋىلىنداعى فەلدشەرلىك-اكۋشەرلىك پۋنكتتىڭ قۇرىلىسى وسى ايدا اياقتالسا، وسىنداي نىساندار جاستار، قاينارلى، جالعىزاعاش اۋىلدارىندا كەلەسى جىلى سالىنادى. سونىڭ ناتيجەسىندە دەنساۋلىق ساقتاۋ سالاسىنىڭ ينفراقۇرىلىمى اۋداننىڭ 8 اۋىلىندا جاقسارادى.
مادەنيەت سالاسى دا نازاردان تىس قالمايدى. «اۋىل-ەل بەسىگى» جوباسى اياسىندا قاراتال اۋىلىندا 100 ورىنعا ارنالعان مادەنيەت ءۇيىنىڭ قۇرىلىسى اياقتالىپ، قوڭىر جانە جالعىزاعاش اۋىلدارىندا بلوكتى-ءمودۋلدى كلۋب قولدانىسقا بەرىلدى. تاعى ءبىر كلۋب اقىن سارا اۋىلىندا كەلەسى اپتادا ىسكە قوسىلادى.
سپورت سالاسىندا ەلتاي، شىمىر، جەتىسۋ اۋىلدارىندا 3 بلوكتى-مودۋلدى سپورتتىق كەشەنىنىڭ قۇرىلىسى جۇرگىزىلۋدە، تاۋەلسىزدىك كۇنى قارساڭىندا قولدانىسقا بەرىلەدى.
جالپى، 2022-2024 جىلدارى اۋدانعا ينفراقۇرىلىمدىق، الەۋمەتتىك نىسانداردى سالۋعا، قايتا جاڭعىرتۋعا جانە جوبالاۋ جۇمىستارىنا وبلىستىق بيۋدجەتتەن 25,9 ملرد. تەڭگە بولىنگەن.
