حالىقتىڭ تۇرمىس-تىرشىلىگىنىڭ تۇزەلۋىنە، الەۋمەتتىك جاعدايىنىڭ جاقسارۋىنا ءتۇرلى مەملەكەتتىك باعدارلامالاردا ءمان بەرىلىپ كەلەدى. مۇقتاج ازاماتتاردى قولداۋعا مەملەكەت تاراپىنان ءبولىنىپ وتىرعان كوڭىل دە، كومەك تە كوپ. اتاۋلى الەۋمەتتىك كومەك بەرۋ جۇمىستارى وبلىستا دا ءبىر جولعا قويىلعان. ونىڭ ىشىندە مۇگەدەكتىگى بار جاندار ەرەكشە مەملەكەت قامقورلىعىنا الىنعان.
وبلىس اكىمدىگى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەركىن كەلەسوۆتىڭ ايتۋىنشا، ايماق بويىنشا 45 571 مۇگەدەكتىگى بار ادام تىركەلگەن. سونداي-اق 18 جاسقا دەيىنگى 6 822 ءجاسوسپىرىم بار.
– 2024 جىلدىڭ 10 ايىندا اتالعان ازاماتتاردان بولەك 2 171 ادام العاشقى رەت مۇگەدەكتىككە شىقتى. تارقاتىپ ايتساق، 1 571 ەرەسەك، 600 جاسوسپىرىمگە مۇگەدەكتىك تۋرالى جاردەماقى بەلگىلەندى. العاشقى مۇگەدەكتىككە شىققان 2 171 ادامنىڭ 1 185-ءى ەڭبەككە قابىلەتتى بولسا، 386-سى زەينەت جاسىنداعىلار. بيىل مۇگەدەكتىگى بار ادامداردىڭ جەكە ابيليتاتسيالاۋ جانە وڭالتۋ باعدارلامالارىنا، اتاپ ايتقاندا، سۋردو-تيفلو قۇرالدار، ساناتورلىق-كۋرورتتىق ەمدەلۋ، پروتەز-ورتوپەديالىق بۇيىمدار، كرەسلو-اربالار، جەكە كومەكشىگە قوسىمشا اقى جانە گيگيەنالىق كۇرالدارعا 4,3 ميلليارد تەڭگە قارجى قارالدى. سونىمەن قاتار جەكە كومەكشى قىزمەتى، ىمداۋ ءتىلى مامانى، ۇيدە كومەك جانە گيگيەنالىق قۇرالدار سىندى الەۋمەتتىك قىزمەتتەرگە 2,6 ميلليارد تەڭگە ءبولىندى. ەسەپتى كەزەڭدە الەۋمەتتىك قىزمەتتەر ۇسىنۋ پورتالىنا تىركەلگەن 25 808 ءوتىنىشتىڭ 24 209-ى قاناعاتتاندىرىلدى، – دەدى ە.ەگەمبەردىۇلى.
مۇگەدەكتىگى بار ادامدارعا قولايلى جاعداي جاساۋ باعىتىندا «AMANAT» پارتياسىنىڭ سايلاۋالدى باعدارلاماسىمەن بەكىتىلگەن جول كارتاسىنا سايكەس جىل سوڭىنا دەيىن تاراز قالاسى مەن اۋدانداردا 259 نىساندى بەيىمدەۋ جوسپارلانعان ەكەن. 2024 جىلدىڭ 10 ايىنىڭ قورىتىندىسىنا كوز جۇگىرتسەك، 189 نىسانعا 133,3 ميلليون تەڭگە قارجى بولىنگەن. الايدا جوسپارلانعان مەجەنى تەك مەركى، شۋ اۋداندارى ورىنداپ، قالعان 70 نىساننىڭ بەيىمدەلمەي وتىرعانى انىقتالعان.
باسقارماعا قاراستى 18 مەديتسينالىق-الەۋمەتتىك مەكەمە بولسا، سونىڭ ىشىندە ەرەسەكتەردى قابىلدايتىن 9 مەكەمەدە مەملەكەت قامقورلىعىنا مۇگەدەكتىگى بار 944 ادام الىنعان ەكەن. ولارعا بەكىتىلگەن ستاندارتقا سايكەس 8 ءتۇرلى ارناۋلى الەۋمەتتىك قىزمەت كورسەتىلۋدە. سول سياقتى مۇگەدەكتىگى بار بالالارعا ارنالعان 9 ورتالىقتا 415 مۇگەدەكتىگى بار بالا ارناۋلى الەۋمەتتىك قىزمەتتەرمەن قامتىلۋدا.
– مۇگەدەكتىگى بار ازاماتتاردى الەۋمەتتىك قورعاۋ باعىتىندا ۇكىمەتتىك ەمەس ۇيىمداردىڭ دا اتقارىپ جاتقان جۇمىستارى ايتارلىقتاي. باسقارما تاراپىنان مەملەكەتتىك-الەۋمەتتىك تاپسىرىس اياسىندا ۇكىمەتتىك ەمەس ۇيىمدار ارقىلى 9 الەۋمەتتىك جوبا ىسكە اسىرىلىپ، 892 مۇگەدەكتىگى بار ادامعا جانە بالالارعا ارناۋلى الەۋمەتتىك قىزمەتتەر كورسەتىلۋدە. بۇل ماقساتتا وبلىستىق بيۋدجەتتەن 234,5 ميلليون تەڭگە قارجى ءبولىندى. سونىمەن قاتار تاراز قالالىق جانە اۋداندىق بيۋدجەتتەردەن 199,9 ميلليون تەڭگە قارجى ءبولىنىپ، 2 300-گە جۋىق مۇگەدەكتىگى بار ازاماتقا 32 ارنايى جابدىقتالعان اۆتوكولىك قىزمەت كورسەتىپ ءجۇر. مۇگەدەكتىگى بار ازاماتتاردى جۇمىسپەن قامتۋدىڭ بەلسەندى شارالارىنا تارتۋ دا نازاردان تىس قالعان ەمەس. بۇل باعىتتا «كۇمىس جاس»، «باستاۋ بيزنەس» باعدارلامالارى اياسىندا تىندىرىمدى تىرلىكتەر اتقارىلۋدا، – دەگەن ەركىن ەگەمبەردىۇلى وبلىستا 8 ەكىنشى دۇنيەجۇزىلىك سوعىستىڭ ارداگەرى مەن مۇگەدەگى بار ەكەنىن جەتكىزدى.
سوعىس ارداگەرلەرىنە جەڭىس كۇنىندە 1,5 ميلليون تەڭگەدەن بىرجولعى الەۋمەتتىك كومەك كورسەتىلگەن. سول سەكىلدى بيىل جەرگىلىكتى بيۋدجەت ەسەبىنەن ارداگەرلەرگە تەڭەستىرىلگەندەرگە جانە مۇگەدەكتەردىڭ جەكە ساناتىنداعى 8 026 ادامعا 1 ميلليون تەڭگەگە الەۋمەتتىك كومەكتەر بەرىلىپتى. سونداي-اق مۇگەدەكتىگى بار بالالاردى ۇيدە وقىتۋعا جۇمسالعان شىعىنداردى وتەۋ بويىنشا 1 166 بالاعا 47,2 ميلليون تەڭگە تاعايىندالىپ، تولەنگەن ەكەن.
