1 جەلتوقسان - قازاقستاندا تۇڭعىش پرەزيدەنت كۇنى. 2012-2021 جىلدارى مەرەكە رەتىندە اتاپ وتىلگەن بۇل كۇن قاڭتار وقيعاسىنان كەيىن مۇنداي قۇرمەتتەن "شەتتەتىلگەن".
بۇل مەيرامنىڭ 1 جەلتوقسان كۇنى اتاپ ءوتىلۋىنىڭ باستى سەبەبى 1991 جىلى ءدال وسى كۇنى تۇڭعىش رەت جالپىحالىقتىق قازاقستان پرەزيدەنتى سايلاۋىنىڭ ءوتۋى. العاشقى بۇكىلحالىقتىق سايلاۋ ناتيجەسىندە نۇرسۇلتان نازارباەۆ تۇڭعىش پرەزيدەنت اتاندى.
بۇل كۇن 2011 جىلعى 10 جەلتوقساندا پارلامەنت سەناتىنىڭ تولىق وتىرىسىندا «قازاقستان رەسپۋبليكاسىنىڭ مەرەكەلەرى تۋرالى» زاڭىنا تولىقتىرۋلار ەنگىزۋ تۋرالى» زاڭناماسىنا قول قويىلىپ، مەملەكەتتىك مەرەكەلەر تىزىمىنە قوسىلعان ەدى.
كەيىننەن 2022 جىلعى 29 قىركۇيەكتەگى زاڭمەن تۇڭعىش پرەزيدەنت كۇنى مەملەكەتتىك مەرەكەلەر تىزىمىنەن الىنىپ تاستالدى جانە ەندى دەمالىس كۇنى ەمەس. قازىر بۇل كۇن كاسىبي كۇن بولىپ سانالادى.
2023 جىلى 1 جەلتوقسان كۇنى نۇرسۇلتان نازارباەۆتىڭ «مەنىڭ ءومىرىم. بوداندىقتان – بوستاندىققا» اتتى مەمۋارلىق تۋىندىسى جارىق كورگەن ەدى.
قازاقستاننىڭ تۇڭعىش پرەزيدەنتىنىڭ سايتىنداعى قازىرگە دەيىنگى سوڭعى مالىمەت اەس قۇرىلىسىنا قاتىستى رەسپۋبليكالىق رەفەرەندۋمدا داۋىس بەرگەنى تۋرالى.
