دۋبايدا وتكەن ء(باا) Distinctive International Arab Festivals Awards فەستيۆالدە قازاقستاندىق تانىمال ءانشى ديماش قۇدايبەرگەن DIAFA جۇلدەسىنە يە بولدى. ءانشى جۇلدەسىن رۋحاني ۇستازى بيبىگۇل تولەگەنوۆاعا ارنادى، دەپ حابارلايدى “ادىرنا” ۇلتتىق پورتالى.
“رۋحاني ۇستازىمىز، ءان الەمىندە قىزمەت ەتىپ جۇرگەن ملن-داعان ادامنىڭ اناسى، اجەسى – بيبىگۇل تولەگەنوۆا. بيبىگۇل اپايىمىز 95 جاسقا تولدى. وسى جەڭىسىمدى اپايىمىزدىڭ قۇرمەتىنە ارناسام دەپ شەشتىم. اپايىمىز مەنىڭ ءاربىر ساحناعا شىعار ساتىمدە نەمەسە باسقا مەملەكەتتەردەگى حالىقارالىق بايقاۋعا بارار كەزىمدە باتا بەرۋدەن ايانباي، ارقاشان بولىسىپ جۇرگەنىن بىلەسىزدەر. سوندىقتان تىلەۋىمدى تىلەپ وتىرعان بيبىگۇل اپايىمىزعا وسى سىيلىقتى ارناعىم كەلەدى”، - دەدى تانىمال ءانشى.
ول ۇستازى جاستايىنان قولداۋ كورسەتىپ كەلە جاتقانىن اتاپ ءوتتى.
“جاستايىمنان ءسىزدىڭ جوعارى دارەجەدەگى ونەرىڭىزگە سۋسىنداپ ءوسىپ، ءسىزدىڭ انالىق، ۇستازدىق وسيەتتەرىڭىز بەن باتاڭىزدىڭ ارقاسىندا قازىرگى كۇنى ازدى-كوپتى جەتىستىكتەرگە قول جەتكىزىپ كەلەمىن”، – دەدى ديماش قۇدايبەرگەن.
ايتا كەتسەك، ديماش قۇدايبەرگەن بىرىككەن اراب امىرلىكتەرىندە حالىقارالىق DIAFA سىيلىعىن الدى.
