قازاقستاندىق دەلەگاتسيا ۆاتيكاندا اپوستولدىق ءارحيۆى مەن كىتاپحانا باسشىلارىمەن كەزدەستى

قازاقستاندىق دەلەگاتسيانى ۆاتيكان اپوستولدىق ءارحيۆىنىڭ ۆيتسە-پرەفەكتى دوكتور پاولو ۆيان (Dott. Paolo Vian) مەن ۆاتيكان ءارحيۆىنىڭ عىلىمي قىزمەتكەرى، پروفەسسور ەنريكو فلاياني (Prof. Enrico Flaiani) قابىلدادى.

بۇل كەزدەسۋگە قازاقستان تاراپىنان قر عىلىم جانە جوعارى ءبىلىم ۆيتسە-ءمينيسترى دارحان احمەد-زاكي، قازاقستان رەسپۋبليكاسىنىڭ شۆەيتساريا كونفەدەراتسياسىنداعى، قاسيەتتى تاقتىڭ جانىنداعى، ليحتەنشتەين كنيازدىگىندەگى جانە مالتا وردەنىندەگى ەلشىسى قايرات سارجانوۆ، ر.ب.سۇلەيمەنوۆ اتىنداعى شىعىستانۋ ينستيتۋتىنىڭ باس ديرەكتورى، فيلولوگيا عىلىمدارىنىڭ دوكتورى، پروفەسسور دۇكەن ءماسىمحانۇلى، عىلىمي جوبا جەتەكشىسى، تاريح عىلىمدارىنىڭ دوكتورى، پروفەسسور، قر ۇعا قۇرمەتتى اكادەميگى، بەلگىلى عالىم قالقامان جۇماعۇلوۆ، PhD, پروفەسسور نۇرتاس ابديمومىنوۆ، PhD, قىتايتانۋشى اينۇر ابيدەنقىزى، اعا عىلىمي قىزمەتكەر باعدات دۇيسەنوۆتەر قاتىستى.

كەزدەسۋدە قر عىلىم جانە جوعارى ءبىلىم ۆيتسە-ءمينيسترى دارحان احمەد-زاكي ۆاتيكان كىتاپحاناسى مەن ارحيۆ قورلارىندا ساقتالعان قۇندى قولجازبالاردى زەرتتەۋ ارقىلى تۇركى الەمىنىڭ باي تاريحىن تانۋعا بولاتىنىن جانە ونىڭ ماڭىزدىلىعىن، سونىمەن قاتار، مەملەكەت باسشىسى قاسىم-جومارت توقاەۆتىڭ جىل باسىندا يتالياعا رەسمي ساپارى اياسىندا ۆاتيكانعا بارىپ، ريم پاپاسى فرانتسيسكپەن كەزدەسۋ ناتيجەسىندە قازاقستاندىق عالىمداردىڭ ۆاتيكان مۇراعاتتارى مەن كىتاپحانالارىن پايدالانۋ ءۇشىن كەلىسىمگە قول جەتكىزگەنىن اتاپ ءوتتى.

شىعىستانۋ ينستيتۋتىنىڭ باس ديرەكتورى، پروفەسسور دۇكەن ءماسىمحانۇلى ەكى ەلدىڭ عىلىمي مەكەمەلەرى اراسىنداعى ىنتىماقتاستىق قازاقستاندىق عالىمداردىڭ سيرەك كەزدەسەتىن قولجازبالارعا ەركىن قول جەتكىزۋىنە زور مۇمكىندىك بەرەتىنىن جانە تۇركى الەمى مەن قازاقستان تاريحى تۋرالى تىڭ دەرەكتەر عىلىمي اينالىمعا قوسىلاتىنىن اتاپ ءوتتى.

كەزدەسۋ بارىسىندا ۆيتسە-پرەفەكت دوكتور پاولو ۆيان مەن پروفەسسور ەنريكو فلاياني قازاقستاندىق دەلەگاتسيانى ەرەكشە ىقىلاسپەن قارسى الىپ، ولاردىڭ عىلىمي باستامالارىن قولداۋعا دايىن ەكەنىن ءبىلدىردى. قازاقستان تاراپىنان عىلىمي ىزدەنىسكە باعىتتالعان جاڭا باستامالارعا ىستىق ىقىلاس تانىتىپ، ءوزارا قارىم-قاتىناستار مەن عىلىمي، مادەني بايلانىستاردى دامىتۋعا دايىن ەكەنىن جەتكىزدى.