ەكس-پرەزيدەنت نۇرسۇلتان نازارباەۆتىڭ قىزى داريعا نازارباەۆانىڭ "ەل دامۋىنا قوسقان ۇلەسىن" باياندايتىن كىتاپ جارىققا شىققانى تۋرالى اقپارات تارادى. بىراق بۇل دەرەكتىڭ جالعان ەكەنى انىقتالدى، دەپ حابارلايدى "ادىرنا" ۇلتتىق پورتالى.
KAZAKH_INFORMتەلەگرام ارناسىندا داريعا نازارباەۆانىڭ "موي زاسلۋگي پەرەد نارودوم" اتتى كىتابى مەلومان كىتاپ دۇكەندەرىندە ساتىلىمعا شىققانى تۋرالى اقپارات تارادى. جەلىدە بۇل كىتاپتىڭ جابىق تۇساۋكەسەرى ءوتىپ، ساتىلىمى توقتاتىلعانى تۋرالى دا دەرەكتەر پايدا بولعان.
الايدا Orda.kz حابارلاۋىنشا، جەلىدە جەلدەي ەسكەن اقپارات جالعان.
«مەلومان» كىتاپ دۇكەندەر جەلىسى مۇنداي اتاۋداعى كىتاپتىڭ تۇسپەگەنىن جانە ەشقانداي ساتىلىمعا شىقپاعانىن حابارلادى.
«جاقىندا الەۋمەتتىك جەلىلەردە «مەنىڭ حالىققا قىزمەتىم» كىتابىنىڭ ساتىلۋى تۋرالى حابارلامالار پايدا بولدى. مۇنداي كىتاپ ەشقاشان ءبىزدىڭ ۆەب-سايتتا نەمەسە Marwin نە «مەلومان» دۇكەندەرىندە بولماعان. ءبىزدىڭ بىلۋىمىزشە، مۇنداي كىتاپ ءالى جوق. ءبىز مەمدەر مەن ازىلدەردىڭ بولعانىنا قۋانىشتىمىز. بۇل ءبىزدىڭ قوعاممەن بىرگە ءومىر ءسۇرىپ، تىنىس الاتىنىمىزدى كورسەتەدى»، - دەپ حابارلادى دۇكەندەر جەلىسىنىڭ ءباسپاسوز قىزمەتى.
ەسكە سالا كەتەيىك، 2023 جىلدىڭ 1 جەلتوقسانىندا نۇرسۇلتان نازارباەۆتىڭ كىتابى جارىققا شىققانى رەسمي حابارلانعان بولاتىن. ەكس-پرەزيدەنتتىڭ كىتابى “مەنىڭ ءومىرىم. بوداندىقتان – بوستاندىققا” دەپ اتالادى.
