اقتوبەدە اسكەري بولىمدەردىڭ بىرىندە مەرزىمدى قىزمەتتەگى سارباز قازا تاپتى، دەپ حابارلايدى "ادىرنا" ۇلتتىق پورتالى.
بۇل تۋرالى اقتوبە گارنيزونىنىڭ ءباسپاسوز قىزمەتى رەسمي مالىمدەدى.
"وسى جىلدىڭ 23 قاراشاسىندا اقتوبە گارنيزونىنىڭ اسكەري بولىمدەرىنىڭ بىرىندە قاراۋىلدىق قىزمەت اتقارۋ بارىسىندا مەرزىمدى قىزمەتتەگى سارباز بەكىتىلگەن قارۋدان ءوزىن-ءوزى اتىپ، سۋيتسيد جاسادى", – دەلىنگەن ءباسپاسوز حابارلاماسىندا.
وقيعانىڭ سەبەپتەرى مەن ءمان-جايى انىقتالۋدا.
اتالعان فاكتى بويىنشا قىلمىستىق ءىس قوزعالىپ جاتقاندىقتان، تەرگەۋ مۇددەسىنە بايلانىستى وزگە اقپارات جاريالانبايدى، دەپ قوستى ءباسپاسوز قىزمەتى.
قۇرلىق اسكەرلەرى قولباسشىلىعى قازا تاپقان ساربازدىڭ جاقىندارى مەن تۋىستارىنا كوڭىل ايتتى.
بۇعان دەيىن ۇقك شەكارا قىزمەتىنىڭ ءباسپاسوز قىزمەتى شىعىس قازاقستان وبلىسىندا مەرزىمدى قىزمەتتەگى ساربازدىڭ وتباسىنداعى جانجال سالدارىنان ءوز-وزىنە قول جۇمساعانى تۋرالى حابارلاعان ەدى.
