اق ءۇي باسشىسى ۋكرايناعا اقش پەن باسقا دا ەلدەردىڭ قولداۋ كورسەتۋىنىڭ ماڭىزدىلىعىن اتاپ ءوتتى، دەپ حابارلايدى "ادىرنا" ۇلتتىق پورتالى golosameriki.com-عا سىلتەپ.
اقش پرەزيدەنتى دجو بايدەن گولودومور قۇرباندارىن ەسكە الۋ كۇنىنە بايلانىستى مالىمدەمە جاسادى. 1930 جىلداردىڭ باسىندا ۋكراينادا ۇيىمداستىرىلعان اشارشىلىقتان قازا تاپقان ادامداردى ەسكە الۋعا ارنالعان كۇن قاراشا ايىنىڭ ءتورتىنشى سەنبىسىندە اتالىپ وتەدى.
«توقسان ءبىر جىل بۇرىن يوسيف ستالين مەن كەڭەستىك رەجيم گولودوموردى – زورلىق-زومبىلىقپەن ۇيىمداستىرىلعان اشتىقتى تۋدىردى، ونىڭ سالدارىنان ميلليونداعان ۋكرايندار قازا تاپتى، – دەلىنگەن اق ءۇي سايتىندا جاريالانعان مالىمدەمەدە. – ءبىز گولودوموردان امان قالعاندار مەن ولاردىڭ ۇرپاقتارىن دا قۇرمەتتەيمىز، ولار ءستاليننىڭ ۋكراين ۇلتتىق بولمىسىن جويۋ ارەكەتتەرىنە قاراماستان، ەركىن، تاۋەلسىز جانە دەموكراتيالىق ۋكراينا قۇردى»، - دەدى حابارلامادا.
ءوز مالىمدەمەسىندە اق ءۇي باسشىسى ۆاشينگتوننىڭ كيەۆتى قولداۋ جونىندەگى ۇستانىمىن تاعى دا راستادى. بايدەن «سوڭعى ءۇش جىلعا جۋىق ۋاقىتتا رەسەي ۋكراينا حالقىن جويۋ جانە ۋكراينانى الەم كارتاسىنان ءوشىرۋ ءۇشىن قاتىگەز سوعىس جۇرگىزىپ جاتقانىن» ەسكە سالدى.
«مەنىڭ ۋكراين حالقىنا بۇگىنگى كۇنگى جولداۋىم ايقىن: امەريكا قۇراما شتاتتارى سىزدەردىڭ وتكەندەرىڭىزدى قۇرمەتتەيدى جانە قازىرگى ۋاقىتتا سىزدەرمەن بىرگە»، – دەپ تۇيىندەدى پرەزيدەنت. ول ۋكراينانىڭ ادىلدىككە جانە تاڭداعان ەۋرواتلانتيكالىق بولاشاعىنا ۇمتىلىسىن قولدايتىنىن مالىمدەدى.
گولودومور – 1932-1933 جىلدارى ۋكراين كسر-ىندە بولعان جاپپاي اشتىق. ول كەڭەستىك بيلىكتىڭ استىق جيناۋ جانە ۋكراين شارۋالارىنان ازىق-تۇلىك قورىن تولىعىمەن تاركىلەۋ ساياساتىنىڭ ناتيجەسىندە ورىن الدى.
