Aq úı basshysy Ýkraınaǵa AQSh pen basqa da elderdiń qoldaý kórsetýiniń mańyzdylyǵyn atap ótti, dep habarlaıdy "Adyrna" ulttyq portaly golosameriki.com-ǵa siltep.
AQSh prezıdenti Djo Baıden Golodomor qurbandaryn eske alý kúnine baılanysty málimdeme jasady. 1930 jyldardyń basynda Ýkraınada uıymdastyrylǵan asharshylyqtan qaza tapqan adamdardy eske alýǵa arnalǵan kún qarasha aıynyń tórtinshi senbisinde atalyp ótedi.
«Toqsan bir jyl buryn Iosıf Stalın men keńestik rejım Golodomordy – zorlyq-zombylyqpen uıymdastyrylǵan ashtyqty týdyrdy, onyń saldarynan mıllıondaǵan ýkraındar qaza tapty, – delingen Aq úı saıtynda jarııalanǵan málimdemede. – Biz Golodomordan aman qalǵandar men olardyń urpaqtaryn da qurmetteımiz, olar Stalınniń ýkraın ulttyq bolmysyn joıý áreketterine qaramastan, erkin, táýelsiz jáne demokratııalyq Ýkraına qurdy», - dedi habarlamada.
Óz málimdemesinde Aq úı basshysy Vashıngtonnyń Kıevti qoldaý jónindegi ustanymyn taǵy da rastady. Baıden «sońǵy úsh jylǵa jýyq ýaqytta Reseı Ýkraına halqyn joıý jáne Ýkraınany álem kartasynan óshirý úshin qatygez soǵys júrgizip jatqanyn» eske saldy.
«Meniń ýkraın halqyna búgingi kúngi joldaýym aıqyn: Amerıka Qurama Shtattary sizderdiń ótkenderińizdi qurmetteıdi jáne qazirgi ýaqytta sizdermen birge», – dep túıindedi prezıdent. Ol Ýkraınanyń ádildikke jáne tańdaǵan eýroatlantıkalyq bolashaǵyna umtylysyn qoldaıtynyn málimdedi.
Golodomor – 1932-1933 jyldary Ýkraın KSR-inde bolǵan jappaı ashtyq. Ol keńestik bıliktiń astyq jınaý jáne ýkraın sharýalarynan azyq-túlik qoryn tolyǵymen tárkileý saıasatynyń nátıjesinde oryn aldy.
