وزبەكستان پرەزيدەنتى شاۆكات ميرزيەەۆ رەسپۋبليكانىڭ جاڭا شاقىرىلىمداعى ولي ماجليس (پارلامەنت) زاڭ شىعارۋ پالاتاسىنىڭ ءبىرىنشى وتىرىسىندا ءسوز سويلەپ، پارلامەنتتەگى وپپوزيتسيانى جانداندىرۋ كەرەگىن ايتتى. ميرزيەەۆتىڭ ءسوزىن ونىڭ ءباسپاسوز حاتشىسى شەرزود اسادوۆ كەلتىردى، دەپ حابارلايدى “ادىرنا” ۇلتتىق پورتالى
Fergana.agency اگەنتتىگىنىڭ مالىمەتىنشە، وسىعان بايلانىستى پرەزيدەنت وپپوزيتسياعا كەپىلدىك بەرىلگەن قۇقىقتار سانىن ۇشتەن التىعا دەيىن ۇلعايتۋدى، سونداي-اق مۇنداي پارتيالاردىڭ وكىلدەرىنە تومەنگى پالاتا كوميتەتى توراعاسىنىڭ ءبىر لاۋازىمىن جانە پارلامەنت كوميتەتتەرىندەگى ەكى دەپۋتاتتىق ورىندى بەرۋدى ۇسىنعان.
ميرزيەەۆ ەگەر سالاۋاتتى باسەكەلەستىك پەن قاراما-قايشى پىكىرلەردىڭ كۇرەسى سايلاۋدان زاڭ شىعارۋ پالاتاسىنىڭ قابىرعاسىنا كوشەتىن بولسا، بۇل حالىقتىڭ مۇددەسى ءۇشىن زاڭداردى ازىرلەۋگە قىزمەت ەتەتىنىن اتاپ ءوتتى.
«وتكەن سايلاۋدا ساياسي پارتيالاردىڭ باعدارلامالارى مەن يدەيالارى ءبىر-بىرىنەن ەرەكشەلەنىپ، ءارتۇرلى ساياسي يدەولوگيالاردىڭ كۇرەسى ايقىن كورىندى»، - دەپ قوستى رەسپۋبليكا باسشىسى.
ميرزيەەۆتىڭ ايتۋىنشا، جاڭا داۋىردە پارلامەنت ناعىز حالىق ۇيىنە، ال ونىڭ تومەنگى پالاتاسى – يدەيالار گەنەراتورىنا، سالاۋاتتى باسەكەلەستىك پەن پىكىرتالاس الاڭىنا اينالۋى ءتيىس.
سونداي-اق وزبەكستان باسشىسى الداعى زاڭ جوبالارىنىڭ باسىم باعىتتارىن اتاپ ءوتتى:
- مىندەتتى مەديتسينالىق ساقتاندىرۋ جۇيەسىن نىعايتۋ;
- مەكتەپ نەمەسە بالاباقشا سالۋدى جوسپارلاعان ينۆەستورلاردى قولداۋ;
- فينتەح، ستارتاپتار جانە فرانچايزينگ ءۇشىن قۇقىقتىق نەگىز قۇرۋ;
- جاساندى ينتەللەكتتى رەتتەۋ;
- ەنەرگەتيكالىق سەكتورعا نارىقتىق تەتىكتەردى ەنگىزۋ.
وزبەكستان پرەزيدەنتىنىڭ پارلامەنتتىڭ تومەنگى پالاتاسى وتكەن شاقىرىلىممەن سالىستىرعاندا 60%-عا جاڭارعانىن، 63 دەپۋتات قايتا سايلانعانىن، 87-ءسى جاڭادان كەلگەنىن باسا ايتتى. ونىڭ 11-ءى 35 جاسقا دەيىنگى ازاماتتار. سونىمەن قاتار، دەپۋتاتتاردىڭ 38%-ىن ايەلدەر قۇرايدى، بۇل ورتالىق ازيا ەلدەرىندەگى ەڭ جوعارى كورسەتكىش. سونداي-اق، تاريحتا العاش رەت مۇمكىندىگى شەكتەۋلى ازامات ماندات الدى.
وتىرىستا زاڭ شىعارۋ پالاتاسىنىڭ سپيكەرى بەكىتىلدى. بۇل لاۋازىمدى 2015 جىلدان بەرى توراعا قىزمەتىن اتقارعان نۋريددين (نۋردينجون) يسمويلوۆ قالدىردى. رەگلامەنتكە ەنگىزىلگەن وزگەرىستەرگە سايكەس، سپيكەردىڭ جەتى ورىنباسارىنىڭ ورنىنا ەكەۋى عانا سايلانادى. ولار ليبەرالدىق-دەموكراتيالىق پارتيانىڭ وكىلدەرى ماۆلۋدا حودجاەۆ پەن راحيمجون حاكيموۆ بولدى.
ۆيتسە-سپيكەرلەر وكىلەتتىگى كەزەڭىندە ساياسي بىرلەستىكتەرگە مۇشەلىگىن توقتاتاتىنى جانە ولاردىڭ پارلامەنتتەگى فراكتسياسىنىڭ قۇرامىنا كىرە المايتىنى اتاپ وتىلگەن.
وتكەن اپتادا وزبەكستان ولي ءماجليسىنىڭ جوعارعى پالاتاسى – سەناتتىڭ قۇرامى جاساقتالدى. قازىر ءار وبلىس التى ەمەس، ءتورت ادام سايلايتىندىقتان، سەناتورلاردىڭ جالپى سانى 100-دەن 65-كە دەيىن قىسقاردى.
ايماقتاردان ۇسىنىلعان ساياساتكەرلەردەن باسقا تاعى توعىزىن پرەزيدەنت تاعايىندادى. ونىڭ ۇستىنە، ولاردىڭ التاۋى وتكەن شاقىرىلىمداعى سەناتتا جۇمىس ىستەگەن، ونىڭ ىشىندە ەڭ جاس سەناتور، 30 جاستاعى الىشەر سادۋللاەۆ تا بار.
جالپى، رەسپۋبليكا ورتالىق سايلاۋ كوميسسياسىنىڭ مالىمەتى بويىنشا، پارلامەنتتىڭ جوعارعى پالاتاسى مۇشەلەرىنىڭ 56,6 پايىزى 60 جاستان اسقان ازاماتتار، 41,6 پايىزى 40 پەن 60 جاس ارالىعىنداعى ازاماتتار.
سەناتقا ءداستۇر بويىنشا قاراقالپاقستان جوقارعى كەڭەسىنىڭ (وزبەكستان قۇرامىنداعى ەگەمەندى رەسپۋبليكا) توراعاسى، وبلىستار مەن تاشكەنت قالاسىنىڭ اكىمدەرى (اكىمشىلىك باسشىلارى) كىردى.
