قىتاي «حاولۋن» اتتى كوپ رەت پايدالانۋعا بولاتىن عارىشتىق شاتتلدىڭ ازىرلەنىپ جاتقانىن مالىمدەدى. بۇل اپپارات «تيانگۋن» عارىش ستانتسياسىنا جۇكتەردى جەتكىزۋ جانە ولاردى جەرگە قايتا الىپ كەلۋ ءۇشىن قولدانىلادى، دەپ حابارلايدى "ادىرنا" ۇلتتىق پورتالى حايتەك پليۋس سايتىنا سىلتەمە جاساپ.
جاڭا شاتتلدى مەملەكەتتىك AVIC كورپوراتسياسىنىڭ باسشىلىعىمەن چەندۋ اەروقۇرىلعىلاردى جوبالاۋ جانە زەرتتەۋ ينستيتۋتى جاساپ جاتىر. العاشقى ۇشۋعا دايىن بولۋ مەرزىمى ءالى ناقتىلانباعان. الايدا قىتايدا بىرنەشە جىلدان بەرى وربيتادا ۇزاق مەرزىمدى ۇشۋلار جاسايتىن وسىعان ۇقساس اسكەري اپپارات بار.
«حاولۋن» قازىرگى «تيانچجوۋ» ءبىر رەتتىك جۇك كەمەلەرىنە قاراعاندا ەكونوميكالىق تۇرعىدا تيىمدىرەك جانە كوپ قىزمەت اتقاراتىن بولادى. «تيانچجوۋ» ستانتسيانى جابدىقتاۋ ءۇشىن پايدالانىلادى، بىراق اتموسفەراعا كىرگەندە جانىپ كەتەدى. جاڭا شاتتلدىڭ باستى ارتىقشىلىعى – جەرگە جۇكتەر مەن عىلىمي ەكسپەريمەنتتەردىڭ ناتيجەلەرىن قايتارا الادى. ول زىمىران ارقىلى ۇشىرىلىپ، ۇشۋ-قونۋ جولاعىنا ۇشاق سەكىلدى قونادى.
شاتتلدىڭ ۇزىندىعى – 10 مەتر، قاناتتارىنىڭ ۇزىندىعى – 8 مەتر، ال سالماعى «تيانچجوۋ» جۇك ءمودۋلىنىڭ سالماعىنان ەكى ەسە جەڭىل، شامامەن 14 توننا. قازىرگى ۋاقىتتا جوبا ينجەنەرلىك تەكسەرۋ كەزەڭىندە تۇر. ءوندىرىس باستالعانعا دەيىن بارلىق جۇيەلەرى مەن قۇرىلىمى زەرتتەلۋدە.
باس كونسترۋكتور فان يۋانپەننىڭ ايتۋىنشا، «حاولۋن» عارىش اپپاراتى مەن ۇشاقتىڭ ەلەمەنتتەرىن بىرىكتىرەدى.
قىتاي «تيانگۋن» ستانتسياسىن كەم دەگەندە 10 جىل پايدالانىپ، ونى 3 مودۋلدەن 6 مودۋلگە دەيىن كەڭەيتۋدى جوسپارلاپ وتىر. «حاولۋن» ستانتسيانى ازىق-تۇلىكپەن، عىلىمي جابدىقتارمەن جانە باسقا دا قاجەتتى رەسۋرستارمەن قامتاماسىز ەتۋ ءۇشىن ماڭىزدى قۇرال بولماق.
حالىقارالىق دەڭگەيدە باسقا كومپانيالار دا وسىعان ۇقساس جوبالاردى ازىرلەۋدە. مىسالى، امەريكالىق Sierra Space كومپانياسى تومەنگى جەر وربيتاسىنا جۇكتەر مەن ەكيپاجداردى جەتكىزۋگە ارنالعان Dream Chaser شاتتلىن جاساپ جاتىر.
