قازاقستان حالقىنىڭ ءبىر جىل ىشىندەگى ءوسىمى 223 مىڭ 218 ادامعا ارتقان، دەپ حابارلايدى "ادىرنا" ۇلتتىق پورتالى. بۇل ورتا ەسەپپەن ءبىر قالا حالقىن قۇرايدى.
2023 جىلى ءدال 16 قاراشادا قازاقستان حالقىنىڭ 20 ميلليونعا جەتكەنى حابارلانعان ەدى. سوندا 20 ميلليونىنشى بولۋى مۇمكىن بەس نارەستەنىڭ ءبىر ۋاقىتتا دۇنيەگە كەلگەنى ايتىلعان. سودان بەرى ەل حالقىنا 223 مىڭ 218 ادامنىڭ قوسىلعانى بەلگىلى بولدى.
رەسمي دەرەكتە كورسەتىلگەن ءوسىم حالىقتىڭ تابيعي كوبەيۋى مەن كوشى-قون ۇردىستەرىنە بايلانىستى قالىپتاستى.
قازاقستاننىڭ تۋ دەڭگەيى جوعارى مەملەكەتتەردىڭ قاتارىندا ەكەنىن ەسكەرسەك، تابيعي ءوسىم حالىق سانىنىڭ تۇراقتى ۇلعايۋىنا سەبەپكەر بولعان. الايدا 2024 جىلى ەلدە تۋ كورسەتكىشى وتكەن جىلمەن سالىستىرعاندا تومەندەگەن. 2023 جىلى ومىرگە كەلگەندەر سانى 290 894 ادامدى قۇراسا، 2024 جىلى بۇل كورسەتكىش 12 196 ادامعا ازايعان. ياعني، بيىل 278 698 نارەستە دۇنيەگە كەلدى.
قازاقستان ستاتيستيكا كوميتەتىنىڭ ۇسىنعان سانىنا قاراساق، قايتىس بولعاندار سانى بىلتىرعىعا قاراعاندا 3 363-كە ارتىق. 2023 جىلى 96 141 ادام ومىردەن وتسە، 2024 جىلى 99 504 ادام قايتىس بولعان.
قازاقستاننىڭ ءار ايماعىنداعى حالىق سانىنىڭ وزگەرىسى ءارتۇرلى دەڭگەيدە. 2023 جىلى ەلىمىزگە كەلگەندەر سانى 19136 ادام بولسا، بيىل 20383 ادامدى قۇراعان. 2024 جىلى قالا تۇرعىندارى 12 704 977 ادامعا جەتسە، اۋىل حالقى 7 518 241 ادامدى قۇراعان.
ەلىمىزدە ەرلەرگە قاراعاندا ايەل ادامداردىڭ سانى باسىمىراق. ناقتىراق ايتساق، قازاقستاندا 10 342 959 ايەل ادام تۇرسا، ەر ازاماتتاردىڭ سانى - 9 880 259.
پرەزيدەنت قاسىم-جومارت توقاەۆ 2023 جىلى 16 قاراشادا قازاقستان حالقىنىڭ سانى 20 ميلليونعا جەتكەنىنە بايلانىستى ەلدى قۇتتىقتاعان. مەملەكەت باسشىسىنىڭ X (بۇرىنعى twitter) پاراقشاسىندا جاريالاعان قۇتتىقتاۋىندا مىنانداي جايلار ايتىلعان.
«حالقىمىزدىڭ سانى 20 ميلليونعا جەتتى! بارشاڭىزدى اقجولتاي جاڭالىقپەن قۇتتىقتايمىن! باقىتتى وتباسى – باقۋاتتى ەلدىڭ نەگىزى. مەملەكەت وتباسى قۇندىلىقتارىن نىعايتۋعا، انا مەن بالانى قورعاۋعا باسا ءمان بەرەدى. حالىقتىڭ دەرەكتەر بازاسىنىڭ كورسەتكىشتەرىنە سايكەس، 2023 جىلعى 14 قاراشادا تاڭعى ساعات 8.10-دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى. قازاقستاننىڭ مەرەيلى ازاماتتارى ۇلىتاۋ، جەتىسۋ، اتىراۋ، اقمولا جانە تۇركىستان وبلىستارىندا دۇنيەگە كەلدى. ولاردىڭ ىشىندە 3 ۇل جانە 2 قىز بار»، – دەلىنگەن قۇتتىقتاۋ جازباسىندا.
ەسكە سالا كەتسە، كورشىلەس وزبەكستاندا 2023 جىلعى 1 ساۋىردەگى جاعداي بويىنشا حالىق سانى 36 ملن 197 مىڭ ادامدى قۇراعان. ال 2024 جىلدىڭ 1 ماۋسىمىنداعى دەرەكتە 37 139 008 ادامعا جەتكەنى كورسەتىلدى. وزبەكستاندا حالىق سانى ءبىر جىلدىڭ ىشىندە 942 مىڭعا ارتقان.
عالامتورداعى اقپاراتقا سۇيەنسەك، قىرعىزستاندا بىلتىر 6 912 666 ادام تۇرسا، بيىل 7 222 724 ادامعا جەتكەن. دەمەك، قىرعىزستان حالقىنىڭ سانى ءبىر جىلدا 310 مىڭعا وسكەن.
