ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي وتكەن ءىس-شارادا مەملەكەت باسشىسى قاسىم-جومارت توقاەۆ ەلىمىزدىڭ تاريحىنداعى قاسىرەتتى كەزەڭدەردى ۇمىتپاي، سول ناۋبەتتەردەن ساباق الۋدىڭ ماڭىزىن ەرەكشە اتاپ ءوتتى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، سوڭعى جىلدارى ساياسي قۋعىن-سۇرگىن قۇرباندارىن اقتاۋ بويىنشا اۋقىمدى جۇمىستار جۇرگىزىلىپ كەلەدى. وسىدان بەس جىل بۇرىن قۇرىلعان مەملەكەتتىك كوميسسيا ءۇش جىل بويى ۇزدىكسىز ەڭبەك ەتىپ، 300 مىڭنان استام ازاماتتىڭ ساياسي اقتالۋىنا جول اشقان. سونىمەن قاتار 2,5 ميلليوننان استام قۇجاتتىڭ قۇپيا بەلگىسى الىنىپ، 72 تومدىق جيناق جانە الاش قايراتكەرلەرىنە قاتىستى 12 تومدىق ماتەريال جارىق كوردى.
ء"تول تاريحىمىزدىڭ اقتاڭداق بەتتەرىن اشۋ – اتا-بابالارىمىزدىڭ جانە كەيىنگى ۇرپاقتىڭ الدىنداعى قاستەرلى بورىشىمىز.
وسىدان 5 جىل بۇرىن ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلدى. كوپتەگەن ساراپشىلار مەن عالىمدار ءۇش جىل بويى تىنىمسىز ەڭبەك ەتتى. مەملەكەتتىك جانە مەكەمەلىك ارحيۆ قۇجاتتارى ەگجەي-تەگجەي زەرتتەلدى. ساياسي قۋعىنعا ۇشىراعان 300 مىڭنان استام ازامات اقتالدى. ەكى جارىم ميلليوننان استام ماتەريالدىڭ قۇپيا بەلگىسى الىنىپ تاستالدى.
كوميسسيا زەرتتەگەن قۇجاتتار نەگىزىندە 72 تومدىق جيناق دايىندالدى. قۋعىن-سۇرگىن كەزىندە الاشوردا قايراتكەرلەرىنە قاتىستى قوزعالعان ىستەر 12 توم بولىپ جارىققا شىقتى. بۇل ەڭبەكتى ازىرلەۋ بارىسىندا بۇرىن ەش جەردە جاريا ەتىلمەگەن قۇجاتتار العاش رەت عىلىمي اينالىمعا ەنگىزىلدى", – دەدى پرەزيدەنت.
ارنايى ارحيۆ ورتالىعى قۇرىلىپ، بۇرىن قۇپيا بولعان 700 مىڭنان استام قۇجات عىلىمي اينالىمعا بەرىلدى. توقاەۆ بۇل باستامالاردىڭ تاريحي ادىلەتتىلىكتى قالپىنا كەلتىرۋ جولىنداعى ماڭىزدى قادام ەكەنىن اتاپ ءوتتى.
پرەزيدەنت قۋعىن-سۇرگىن مەن اشارشىلىق سالدارىنان قازاق حالقى ەڭ كوپ زارداپ شەككەنىن ەسكە سالا وتىرىپ، بۇل قاسىرەت تەك ءبىر ۇلتتىڭ عانا ەمەس، تۇتاس كەڭەستىك كەڭىستىكتەگى حالىقتاردىڭ تراگەدياسى ەكەنىن جەتكىزدى.
"بۇرىن قۇپيا بولىپ كەلگەن 700 مىڭ قۇجات، ياعني قىلمىستىق ءىس وسى ورتالىققا تاپسىرىلدى. بۇل — شىن مانىندە، ەلىمىزدە بۇرىن-سوڭدى بولماعان وتە اۋقىمدى جۇمىس.
اشىعىن ايتۋىمىز كەرەك، باسقا مەملەكەتتەردە وسىنداي كولەمدى زەرتتەۋلەر ءالى جاسالعان جوق. مۇنىڭ ءبارى — زەرتتەۋشى مامانداردىڭ قاجىرلى ەڭبەگىنىڭ ناتيجەسى. مەن ەل تاريحىن زەردەلەۋگە بەلسەنە اتسالىسقان بارشا ازاماتتارعا، سونىڭ ىشىندە كوميسسيا مۇشەلەرىنە شىن جۇرەكتەن ريزاشىلىعىمدى بىلدىرەمىن. ولاردىڭ ەڭبەگى مىندەتتى تۇردە ماراپاتتالادى. قازىرگى تاڭدا عالىمدارىمىز جينالعان دەرەكتەردى جۇيەلەپ، ءبىر ىزگە ءتۇسىرىپ جاتىر. بۇل — ۇلت كەلەشەگىنە قاجەتتى اسا ماڭىزدى جۇمىس", – دەدى مەملەكەت باسشىسى.
ءسوز سوڭىندا پرەزيدەنت تاريحتى ساياسات قۇرالىنا اينالدىرماۋعا شاقىرىپ، ۇلتىمىزدىڭ بەرىك بىرلىگى، جاۋاپكەرشىلىگى مەن گۋمانيزمى ەل بولاشاعى ءۇشىن باستى قۇندىلىق بولىپ قالا بەرۋى كەرەكتىگىن ايتتى.
ۇقساس جاڭالىقتار
