Qazaqstan halqynyń bir jyl ishindegi ósimi 223 myń 218 adamǵa artqan, dep habarlaıdy "Adyrna" ulttyq portaly. Bul orta eseppen bir qala halqyn quraıdy.
2023 jyly dál 16 qarashada Qazaqstan halqynyń 20 mıllıonǵa jetkeni habarlanǵan edi. Sonda 20 mıllıonynshy bolýy múmkin bes náresteniń bir ýaqytta dúnıege kelgeni aıtylǵan. Sodan beri el halqyna 223 myń 218 adamnyń qosylǵany belgili boldy.
Resmı derekte kórsetilgen ósim halyqtyń tabıǵı kóbeıýi men kóshi-qon úrdisterine baılanysty qalyptasty.
Qazaqstannyń týý deńgeıi joǵary memleketterdiń qatarynda ekenin eskersek, tabıǵı ósim halyq sanynyń turaqty ulǵaıýyna sebepker bolǵan. Alaıda 2024 jyly elde týý kórsetkishi ótken jylmen salystyrǵanda tómendegen. 2023 jyly ómirge kelgender sany 290 894 adamdy qurasa, 2024 jyly bul kórsetkish 12 196 adamǵa azaıǵan. Iaǵnı, bıyl 278 698 náreste dúnıege keldi.
Qazaqstan statıstıka komıtetiniń usynǵan sanyna qarasaq, qaıtys bolǵandar sany byltyrǵyǵa qaraǵanda 3 363-ke artyq. 2023 jyly 96 141 adam ómirden ótse, 2024 jyly 99 504 adam qaıtys bolǵan.
Qazaqstannyń ár aımaǵyndaǵy halyq sanynyń ózgerisi ártúrli deńgeıde. 2023 jyly elimizge kelgender sany 19136 adam bolsa, bıyl 20383 adamdy quraǵan. 2024 jyly qala turǵyndary 12 704 977 adamǵa jetse, aýyl halqy 7 518 241 adamdy quraǵan.
Elimizde erlerge qaraǵanda áıel adamdardyń sany basymyraq. Naqtyraq aıtsaq, Qazaqstanda 10 342 959 áıel adam tursa, er azamattardyń sany - 9 880 259.
Prezıdent Qasym-Jomart Toqaev 2023 jyly 16 qarashada Qazaqstan halqynyń sany 20 mıllıonǵa jetkenine baılanysty eldi quttyqtaǵan. Memleket basshysynyń X (burynǵy twitter) paraqshasynda jarııalaǵan quttyqtaýynda mynandaı jaılar aıtylǵan.
«Halqymyzdyń sany 20 mıllıonǵa jetti! Barshańyzdy aqjoltaı jańalyqpen quttyqtaımyn! Baqytty otbasy – baqýatty eldiń negizi. Memleket otbasy qundylyqtaryn nyǵaıtýǵa, ana men balany qorǵaýǵa basa mán beredi. Halyqtyń derekter bazasynyń kórsetkishterine sáıkes, 2023 jylǵy 14 qarashada tańǵy saǵat 8.10-da týǵan 5 bala elimizdiń 20 mıllıonynshy turǵyny atandy. Qazaqstannyń mereıli azamattary Ulytaý, Jetisý, Atyraý, Aqmola jáne Túrkistan oblystarynda dúnıege keldi. Olardyń ishinde 3 ul jáne 2 qyz bar», – delingen quttyqtaý jazbasynda.
Eske sala ketse, kórshiles Ózbekstanda 2023 jylǵy 1 sáýirdegi jaǵdaı boıynsha halyq sany 36 mln 197 myń adamdy quraǵan. Al 2024 jyldyń 1 maýsymyndaǵy derekte 37 139 008 adamǵa jetkeni kórsetildi. Ózbekstanda halyq sany bir jyldyń ishinde 942 myńǵa artqan.
Ǵalamtordaǵy aqparatqa súıensek, Qyrǵyzstanda byltyr 6 912 666 adam tursa, bıyl 7 222 724 adamǵa jetken. Demek, Qyrǵyzstan halqynyń sany bir jylda 310 myńǵa ósken.
