اتىراۋ قالاسىنداعى «ءبىلىم-يننوۆاتسيا» ليتسەيىنىڭ 11-سىنىپ وقۋشىلارى حايدار اتاگۋللا مەن قايىرحان لۇقپانوۆ ازىرلەگەن «اقىلدى كوزىلدىرىك» جوباسى الەمنىڭ ۇزدىك 100 جوباسى قاتارىنا ەندى. جوبا Jasscience-2024 بايقاۋىنىڭ جەڭىمپازى بولىپ، الەمدەگى ەڭ بەدەلدى باعدارلامالاردىڭ ءبىرى 100 Rise Global Winners 2024 تىزىمىنە ەنگىزىلدى. بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«كوزىلدىرىك RikaAI جاساندى ينتەللەكت نەگىزىندە جۇمىس ىستەيدى. بۇل — ساۋساقپەن باسۋ ارقىلى ىسكە قوسىلاتىن ءينتۋيتيۆتى باعدارلاما. ول قولدانۋشىعا قۇلاققاپ ارقىلى داۋىستىق كوماندالار بەرەدى جانە سول ارقىلى قۇرىلعىمەن ءوزارا ارەكەتتەسۋگە مۇمكىندىگى تۋىندايدى. ءبىز ماتەريال جاساۋ ءۇشىن 3D پرينتەردى قولداندىق، ال كامەرا، قۇلاققاپتار مەن ميكروفوندى ارنايى تاپسىرىس بويىنشا الدىق»، — دەيدى جوبا اۆتورلارىنىڭ ءبىرى حايدار اتاگۋللا.
كوزىلدىرىكتەر ءتورت نەگىزگى فۋنكتسيانى اتقارادى. بىرىنشىدەن، ولار ChatGPT نەمەسە Wikipedia سياقتى قويىلعان سۇراقتارعا جاۋاپ بەرەدى. ەكىنشىدەن، ءماتىندى سكانەرلەپ، دىبىستاپ وقيدى. ۇشىنشىدەن، كوزىلدىرىك قوزعالىس كەزىندە كەدەرگىلەر تۋرالى ەسكەرتىپ وتىرادى، بۇل كورۋ قابىلەتى ناشار ادامداردا قۇلاۋ مەن جاراقاتتانۋدىڭ الدىن الۋعا كومەكتەسەدى. تورتىنشىدەن، كوزىلدىرىكتەر بولمەدە بولىپ جاتقان وقيعالار تۋرالى اقپارات بەرىپ، سيپاتتاي الادى.
مينيسترلىك جاس عالىمداردىڭ جەتىستىكتەرىن ماقتانىش ەتەدى جانە ولاردىڭ ءبىلىم مەن عىلىم سالاسىنداعى يننوۆاتسيالىق تەحنولوگيالاردى دامىتۋعا باعىتتالعان تالپىنىستارىنا جان-جاقتى قولداۋ بىلدىرەدى.
