2024 جىلى اۋعانستاندا اپيىن ءوندىرىسى 19 پايىزعا ءوستى. بۇل تۋرالى بۇۇ-نىڭ ەسىرتكى جانە قىلمىس جونىندەگى باسقارماسى ايتتى، دەپ حابارلايدى «ادىرنا» ءتىلشىسى.
«بىلتىر ءوسىم 95 پايىزعا ازايدى. ال بيىلعى اۋديت ناتيجەلەرى بويىنشا تىركەلگەن ءوندىرىس دەڭگەيى 2022 جىلعى دەڭگەيدەن ايتارلىقتاي تومەن»،—دەدى ساراپشىلار.
باسقارمانىڭ مالىمەتىنشە، ستاتيستيكانىڭ وسۋىنە كۇردەلى قارجىلىق جانە گۋمانيتارلىق ماسەلەلەرگە تاپ بولعان اۋعان فەرمەرلەرىنىڭ قيىن جاعدايى سەبەپ بولىپ وتىر.
«ولار ءۇشىن اپيىن ءوسىرۋ كۇنكورىستىڭ بىردەن-ءبىر جولى بولىپ قالا بەرەدى. شارۋالارعا بالامالى تابىس كوزدەرىن تابۋدا شۇعىل كومەك كورسەتۋ قاجەت»،–دەپ ءتۇسىندىردى بۇۇ ەقب اتقارۋشى ديرەكتورى گادا ۆالي.
سونداي-اق بۇل جاعدايعا ەسىرتكى باعاسىنىڭ ءوسۋى دە اسەر ەتكەن. ماسەلەن، تالىپتەر اپيىن كوكنارىن وندىرۋگە تىيىم سالماي تۇرىپ ونىڭ قۇرعاق سىعىندىسى كيلوگرامى 100 دوللار تۇرعان ەدى. ال 2024 جىلدىڭ ءبىرىنشى جارتىجىلدىعىندا اپيىن قۇنى 1 كيللوگرامم ءۇشىن 730 دوللارعا دەيىن كوتەرىلگەن.
حالىقارالىق ساراپشىلار اپيىن وسىرۋدەگى گەوگرافيالىق وزگەرىستەردى دە اتاپ كورسەتتى. بۇرىن ول اۋعانستاننىڭ وڭتۇستىك-باتىسىندا وسىرىلسە، قازىر جالپى ءوندىرىستىڭ 59 پايىزى ەلدىڭ سولتۇستىك-شىعىس پروۆينتسيالارىنا تيەسىلى بولىپ وتىر.
تالىپتەر بۇۇ-نىڭ ەسىرتكى جانە قىلمىس جونىندەگى باسقارماسىنىڭ بايانداماسىندا كەلتىرىلگەن دەرەكتەردىڭ شىندىققا جاناسپايتىنىن ايتتى.
ىشكى ىستەر مينيسترلىگىنىڭ رەسمي وكىلى ابدۋل-ماتين كاني بۇل اقپارات ەلدىڭ جاڭا بيلىگى كوكنار داقىلدارىن جويۋ ناۋقانىن جۇرگىزگەنگە دەيىن جينالعان دەپ بولجايدى. سونداي-اق ەسىرتكىگە قارسى كۇرەس ماسەلە جويىلعانعا دەيىن جالعاساتىنىن اتاپ ءوتتى.
