20 شىلدەدە ۇلتتىق قاۋىپسىزدىك كوميتەتى پروكۋراتۋرانىڭ ۇيلەستىرۋىمەن جەمقورلىق جاسادى دەگەن كۇدىكپەن شىمكەنت قالاسى اكىمىنىڭ ورىنباسارى ماقسۇت يساحوۆتى ۇستادى، دەپ حابارلايدى “ادىرنا” ۇلتتىق پورتالى.
مالىمەت بويىنشا، سوتقا دەيىنگى تەرگەپ-تەكسەرۋ جانە بارلىق قاجەتتى جەدەل تەرگەۋ ءىس-شارالارى جۇرگىزىلىپ جاتىر.
قىلمىستىق-پروتسەستىك كودەكستىڭ 201-بابىنا سايكەس، وزگە اقپارات تەرگەۋ مۇددەسىندە جاريا ەتۋگە جاتپايدى.
ايتا كەتەيىك، ماقسۇت يساحوۆ 1974 جىلى تۋعان. ءبىلىمى جوعارى. ماماندىعى – اۋىل شارۋاشىلىعى ءوندىرىسىنىڭ ەكونوميست-ۇيىمداستىرۋشىسى، زاڭگەر.
ەڭبەك جولىن ىشكى ىستەر باسقارماسىنان باستاعان. بىرقاتار وبلىستا كەدەن سالاسىندا، «قازاقستان تەمىر جولى» ۇلتتىق كومپانياسىندا قىزمەت اتقارعان.
سونىمەن قاتار، شىعىس قازاقستان وبلىسى اكىمى اپپاراتى باسشىسىنىڭ ورىنباسارى، شىعىس قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى، وسكەمەن قالاسى اكىمىنىڭ ورىنباسارى، قارجى مينيسترلىگى مەملەكەتتىك ساتىپ الۋ كوميتەتى توراعاسىنىڭ ورىنباسارى، الماتى قالاسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى، اتالعان قالادا ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى قىزمەتتەرىن اتقارعان.
قر پرەزيدەنتى اكىمشىلىگىنىڭ مەملەكەتتىك ينسپەكتورى بولعان.
2020 جىلدىڭ 7 اقپانىنان باستاپ شىمكەنت قالاسى اكىمىنىڭ ورىنباسارى قىزمەتىن اتقارعان.
